Vuelve’l Folclore na cai n’Uviéu con 170 actuaciones hasta ochobre

Esti sábadu volvía’l Folclore na cai n’Uviéu con 170 actuaciones de grupos y bandes de gaites hasta ochobre.

El conceyal de Festexos y presidente de la Sociedá Uvieina de Festexos (SOF), Roberto Sánchez Ramos presentó esta selmana santa la IX Edición del programa Folclore na cai, qu’entamaba’l sábadu santu, dende les 11.30 a les 14.30 cola actuación de la Banda de gaites “Vetusta”. El conceyal tuvo acompañáu del Director artísticu d’actividaes folclóriques de la SOF, Adolfo García Blanco; de Natalia Álvarez, del grupu “Xuno”, una de les formaciones presentes nel ciclu, y d’Iván Villota, de la Banda de gaites del Naranco, tamién incluyida nel calendariu d’actuaciones del programa.

Roberto Sánchez Ramos aseguró que “el Conceyu d’Uviéu, al traviés de la SOF, propúnxose un añu más averar el folclore tradicional asturianu a los uvieinos y a toles persones que visiten la nuesa ciudá, principal referente turísticu rexonal. Pa ello, desenvolvióse’l proyectu “Folclore tradicional n’Uviéu, que cumple anguaño la so novena edición, y nel que, dende esti sábadu y hasta finales d’ochobre, van participar  cuatro bandes de gaites y diez grupo folclóricos que van actuar tolos sábados, domingos y díes festivos. El prepuesto total xube a 122.260 euros, con un total de 170 actuaciones“. A xuiciu del edil “tratar de dignificar y apurrir dignidá al folclore, a la nuesa música tradicional, que nos últimos años ta viviendo un gran momentu y pollo debemos de poner tolos medios que tenemos al nuesu algame pa potenciala”. Amás de les actuaciones incluyíes nel programa de “Folclore na cai”, añedió’l conceyal de Festexos, “hai qu’añedir les de la Banda de Gaites Ciudad d’Uviéu y la so cantera, la Banda Vetusta, que van realizar otres 120 en fiestes y actos según solicitúes”.

Al respective de la zones nes que van tener llugar les actuaciones incluyíes nel calendariu del programa de Folclore na cai, coordináu por Adolfo García Blanco, el presidente de la SOF adelantró la intención, anguaño, “de llevar la música y el folclore a los barrios” magar dexó claro que “siempres y cuando quien lo solicite respuenda y cuntemos col sofitu de vecinos, asociaciones y comerciantes del barriu que nos pidan l’actuación de les bandes de gaites y de los grupos”.

El conceyal destacó amás la participación d’unos 25 músicos tradicionales de Santiago de Compostela, que van actuar na feria de L’Ascensión, y la intención de “crear hermanamientos ente la banda de gaites d’Uviéu y la gallega”.