Valledor pide la dimisión de la Directora de Política Llinguística

El diputáu d’IX, Francisco Javier garcía Valledor, pidía esti sábadu nun comunicáu qu’asoleyaba pela tarde, la destitución de la Directora Xeneral de Política Llingüística pola so “indiferencia, dexadez, infravaloración o despreciu hacia l’asturianu” no que cinca a la denuncia que Xuristes pol Asturianu ficiere esta selmana pola actuación del Principáu nel informe del Conseyu d’Europa. Bloque por Asturies y UNA tamién criticaron en dellos comunicaos esa actuación mientres que Consuelo Vega negaba esti domingu nun artículu en La Nueva España les acusaciones d’omisión consciente de datos.

Nel comunicáu de Valledor señálase la confirmación de que “la responsabilidá de la desidia y del despreciu a la nuesa llingua nun yera, como quería facer ver Doña Consuelo Vega, responsabilidá del Gobiernu d’España, sinón del Gobiernu asturianu al traviés de la Dirección Xeneral que ella dirixe”. Según el diputáu d’IX-BA-LV “aparte de comprometese a revisar de nuevo tola documentación nel periodu de recoyida de documentación por parte del Comité Europeo y siguir afirmando que ‘nun aportamos información porque nun hubo nenguna petición’, afirma nun recordar una carta del 29 d’ochobre de 2008 que foi remitida al so nome pol Ministeriu d’Administraciones Públiques firmada pol Director Xeneral de Cooperación Autonómica Fernando Gurrea onde s’adxuntaba’l documentu provisional y solicitaba qu’unviáse’l parecer de la Comunidá Autónoma. La carta nun tuvo respuesta, la Directora Xeneral de Política Llingüística dio la callada por respuesta. Y si hubo esta carta n’ochobre de 2008 resulta poco creíble que dende’l mesmo departamentu del Ministeriu nun se consultare previamente”. Valledor afita que “la indiferencia, dexadez, infravaloración o despreciu hacia l’asturianu o’l gallego-asturiano, amosada por Doña Consuelo Vega, xunto coles falsedaes que treslladó a la sociedá asturiana tratando d’escusar la so inaceptable actitú” tien de llevar arreyao “responsabilidaes polítiques, que nesti casu resulten evidentes”, y darréu d’esto pidi la destitución como Directora Xeneral de Política Llingüística de Consuelo Vega.

El Bloque por Asturies y Unidá Nacionalista Asturiana tamién asoleyaron esti día les sos critiques. Dende’l Bloque llamenten “la incompetencia y l’abandonu de la señora Directora Xeneral de Política Llingüística Consuelo Vega col casu de la llingua asturiana y el Comité d’Espertos en Llingues Minoritaries y Rexonales que depende directamente del Conseyu d’Europa” y piden “a la señora Vega que rectifique, se ponga a trabayar y mande al Conseyu d’Europa y al Ministeriu d’Alministraciones Públiques tola documentación sobre la situación de la llingua asturiana”.