Valdesoto celebra les Xornaes de Mazcaraes d’Iviernu

La parroquia de Valdesoto, asitiada nel conceyu de Siero, acueye dende esti vienres les Xornaes de Mazcaraes d’Iviernu, cola presentación de la fiesta cántabra de La Vijanera de Silió, ún de los antroxos más vieyos. No que cinca a la representación asturiana va cuntase con L’aguilando de la parroquia de Xedré, en Cangas del Narcea, col testimoniu de Pepito’l de Llorianes, de 93 años, que va falar de Los sidros y como lo pasaben va más de setenta años viendo les representaciones de les comedies, amás dirán tamién a Valdesoto dende Xedré José Ramón Collar “Quei Funsiquin”, de 75 años y Herminia Galán “Quei’l madreñeiro”, de 86 años que van contar como vivíen L’aguilandu.

El sábadu, de magar les 17:00 va celebrase’l desfile de mázcares tradicionales más importante del país. Va ser la primer vegada que participen cuatro mazcaraes d’Asturies: Os reises de Tormaleo, Os reises del Valledor, L’Aguilandu de Xedré y Los sidros y la Comedia de Valdesoto. Tamién van participar dos mazcaraes de fuera’l país: La Vijanera de Silió (Cantabria) y Los guirrios y las madamas de Llamas de la Ribera (Lleón). Los escolinos de la Escuela Faes tamién van tar presentase y pa finar el desfile van representar la comedia “La Ruina” de Manuel Pergentino Martínez.

La música va correr a cargu de La Bandina del Grupu Principáu de Llugones. A lo llargo’l desfile los vecinos de Lliceñes y Faes van convidar a mazcaritos y visitantes a frixuelos, bébora y delles viandes. Dende l’Asociación animen a tola xente que quiera participar nel desfile a que lo faiga siempres que vaya mazcaritáu d’acuerdu a la tradición (vieyos, vieyes, galanes, dames, muxigangues, etc) y piden que nun vengan con traxes de batman, “ninjas” o coses asemeyaes.

El domingu de magar les 12:00 hores van facer otru desfile dende’l Centru Polivalente de Carbayín onde tará La Vijanera de Silió y los Sidros y la Comedia de Valdesoto. Otra vuelta la música pondránla los collacios de La Bandina del Grupu Principáu de Llugones. Pa finar, representarase “La Politica ye una comedia” de José Ramón Oliva.