Uviéu xúnese al Día Mundial a favor de la Xusticia Social

La conceyala d’Atención a les Persones ya Igualdá, Marisa Ponga acompañó esta selmana, en rueda de prensa al presidente y vicepresidenta del Colexu de Graduaos Sociales d’Asturies, Marcos Óscar Martínez y Alma María Alonso, que presentaron les xornaes que se van realizar por cuenta de la conmemoración del Día Mundial de la Xusticia Social y fixeron entrega d’un manifiestu por cuenta de esta efeméride, que se celebra’l próximu 20 de febreru.

Marisa Ponga esplicó que “la tema de les xornaes d’anguaño ye d’imprescindible reflexón si queremos avanzar n’igualdá: la racionalización de los horarios. Porque’l tiempu ye oru y si nun tenemos conciencia de que ye un bien escaso nun vamos avanzar n’igualdá”.

Dende’l Colexu Oficial de Graduaos Sociales d’Asturies, indicó’l so presidente, “queremos reivindicar nesti Día Mundial de la Xusticia Social 2019 la necesidá d’impulsar midíes lexislatives tendentes a promover una adecuación de los horarios que, nel nuesu país, rixen el tiempu dedicáu al trabayu y aquel dedicáu al esfrute del tiempu propiu. La propuesta que s’alderique nel senu de la Unión Europea en relación a los usos horarios del Continente punxo’l focu tamién sobro’l tiempu y los horarios que, nel nuesu país, rixen la nuesa vida social, llaboral, educativa, d’ociu… Ye ésta una tema complexa, pos s’escapa del ámbitu puramente llaboral al tratase d’una cuestión cultural bien enraigonada nel nuesu país y que tien los sos efectos sobro los nuesos vezos de vida. Por reseñar dellos datos recoyíos na última Encuesta Nacional de Condiciones de Trabayu (2015) ellaborada pol Institutu Nacional de Seguridá ya Hixene nel Trabayu, el 65% de les persones encuestaes señala qu’el so horariu llaboral ye decidíu unilateralmente pola empresa, ensin posibilidá de cambeos. Amás, un 25% de les persones encuestaes reconoz que tien grandes dificultaes p’afaer el so horariu llaboral a los sos compromisos social y familiar; porcentaxe qu’aumenta hasta’l 31% nel tramu d’edá entendíu ente los 35 y 49 años, que ye tamién el tramu nel que les persones tienen individuos al so cargu. Estes dificultaes percíbense más ente’l colectivu de persones que trabayen por cuenta propia (32%) qu’ente’l colectivu d’asalariaes. Amás, un porcentaxe creciente de persones (35%) reconoz que les sos obligaciones llaborales invaden parte del so tiempu propiu al trate obligaes a trabayar fora del so horariu llaboral y, amás, un 32% manifiesta que-y ye difícil o bien difícil disponer d’una o dos hores llibres mientres la so xornada llaboral p’atender un compromisu personal o familiar”.