Uviéu da lluz verde al Plan especial de protección del conxuntu históricu de Olloniego

La Xunta de Gobiernu del Conceyu d’Uviéu dio esta selmana lluz verde al Plan Especial de Protección y Caltenimientu del Conxuntu Históricu de Olloniego, que desenvuelve les previsiones del Plan Xeneral d’Ordenación d’Uviéu pa esti ámbitu, integráu pol Bien d’Interés Cultural (BIC) del Palaciu de Olloniego, la Capiya, la Torre de Muñiz y la Ponte Viejo y la so Redolada de Protección, y el tarrén asitiáu al sur d’ésti hasta l’A-66.

El procedimientu de contratación de los trabayos de redacción del Plan Especial empecipiaran en 2013, resultando axudicatariu José Ramón Fernández Molina. Tres un complexu procesu de depuración de los condicionantes qu’alleguen na área, incluyendo’l trámite de coordinación coles alministraciones afectaes (Conseyería d’Educación y Cultura, Confederación Hidrográfica del Cantábricu, Demarcación  de Carreteres del Estáu n’Asturies, Dirección Xeneral d’Infraestructures y Dirección Xeneral calidable Ambiental, dambes de la Conseyería de Fomentu, Ordenación del Territoriu y Mediu Ambiente).

El conceyal d’Urbanismu, Ignacio Fernández del Pandorial (Somos), valoró la importancia d’esti trámite alministrativu y anunció que nel Presupuestu del próximu añu van acutase inversiones pa “caltener y salvaguardar” esta xoya patrimonial, por desgracia entá desconocida por munchos uvieinos”. Según detalló’l conceyal, hasta la fecha “la falta d’un plan especial torgaba actuar sobre’l conxuntu históricu. Fernández del Pandorial tamién esplicó qu’una de les llínees d’actuación prioritaries del Gobiernu municipal “ye la defensa del perricu patrimoniu cultural uvieín”. Nesti sentíu incidió en que dende la entrada del nuevu equipu de gobiernu nel Conceyu “tomemos la preservación del patrimoniu como una obligación prioritaria pa saldar una delda pindia cola nuesa identidá y el nuesu pasáu, con innegables posibilidaes de futuru”.

L’oxetivu fundamental del Plan Especial ye la protección de los valores culturales presentes nel ámbitu, con una propuesta d’ordenación que contempla usos d’equipamientu y espacios llibres públicos, ensin nengún aprovechamientu priváu, salvo los puntuales yá esistentes dientro de la redolada del BIC.