Uviéu aporta 6.000 euros más esti añu a les asociaciones de mocedá

La Xunta de Gobiernu del Ayuntamientu d’Uviéu aprobó esta selmana pasada la renovación del conveniu de collaboración cola Federación d’Asociaciones Xuveniles d’Uviéu – Conseyu de la Mocedá d’Uviéu pal desenvolvimientu d’actividaes mientres el 2019. D’esti conveniu derívase una subvención municipal de 40.000 euros, que supon una medría de 6.000 euros al respective de l’aportación del pasáu añu, para la realización de nueves iniciatives nel programa d’actividaes.

El programa d’actividaes desenvuelvese en redol a seis proyectos: Información, comunicación y asesoramientu; Servicios a la mocedá; Plan formativu, Proyectos específicos de participación social y xuvenil; Actividaes y campañes de sensibilización; y Mocedá ensin machismu. El conveniu inscribise nel Plan Estratéxicu de Subvenciones de Servicios Sociales y Promoción Social 2017-2019.

La Xunta de Gobiernu tamién s’apautó na ratificación de la programación de 130 actividaes del Programa Ociu Xuvenil d’Uviéu correspondiente al últimu trimestre del añu. Les actividaes de calter gratuitu tán dirixíes a mozos d’ente 12 a 35 años. Esta segunda temporada non solo cubre les fines de selmana de los proyectos La Nueche To y Dolce17, sinón que se van realizar actividaes tanto nes vacaciones escolares d’Ochobre como nes de Navidá. Van desenvolvese en dellos equipamientos municipales como son Centros Xuveniles, el centru de Música Nueva Pedro Bastarrica, Centros Sociales, Biblioteques y Polideportivos. Xuntu col equipu técnicu del programa participen un total de 22 entidaes ensin ánimu d’arriquecimientu del conceyu d’Uviéu.