UNA pide que se financien toles llingües reconocíes pol estáu na Carta Europea de les llingües minoritaries

Unidá Nacionalista Asturiana dio conocencia d’esti posiconamientu al traviés d’un comunicáu nel qu’Ignaciu Llope afirma que contemplar les llingües oficiales nel sistema de financiación “supón una nueva mocada a la dignidá d’Asturies y una perda inxustificada de recursos y propón l’aplicación del conceptu de ‘llingua estatutaria’ pa tornar discriminaciones”.

Unidá Nacionalista Asturiana (UNA) amosó esta esmolición énte l’anuncia del presidente Zapatero nel sentíu de que’l sistema de financiación autonómicu nuevu va empobinar recursos pa financiar los gastos que lleven les llingües oficiales.

Llope afirmó que “mos atopamos énte una nueva consecuencia del provincianismu del gobiernu asturianu que se niega a reconocer con toles consecuencies la realidá llingüística d’Asturies y por ello nun acaba da dar el pasu necesariu pa la supervivencia de la llingua asturiana y pa que finen los agravios comparativos d’Asturies con respecto a otras comunidae, ye dicir, la declaración d’oficialidá”.

Según el voceru de cultura d’UNA “ye evidente qu’hasta que nun hebia una reforma estatutaria l’asturianu nun va poder ser oficial, poro proponemos que s’enample’el criteriu de financiación de ‘llingua oficial’ al de ‘llingua estatutaria’, una categoría que ya foi usada delles veces nel Parllamentu del estáu para incluyir l’asturianu y l’aragonés”. Amás, siguió Llope, la mesma Carta Europea de les Llingües Minoritaries, ratificada pol estáu español y que ye polo tanto de cumplimientu obligáu, inclúi l’asturianu ente les llingües que tienen de ser curiaes, a traviés d’esa fórmula: la mención llegal a la protección de la misma nel estatutu d’autonomía, independientemente del so calter d’oficialidá ”.

Llope indicó amás que, “el limbu llegal nel que s’afaya anguaño l’asturianu ta suponiendo, otra vuelta, una situación de discriminación con respecto a les otres llingües, que nesti casu va suponer amás una perda importante de recursos económicos; ye dicir, los asturianos y asturianes vamos tener que financiar les llingües de los demás mentres vemos como muerre la nuesa”.

Dende UNA desíxese polo tanto al gobiernu asturianu “que s’actúe darréu y que, amparándose nesta fórmula, se pidan los recursos necesarios pa la normalización del asturianu n’ámbitos como la enseñanza, los medios de comunicación, y les rellaciones cola alministración”.