Un concursu d’idees escoyerá 3 murales mientres el Festival de Cultura Urbana d’Avilés FOCART

La conceyalía de Cultura d’Avilés, dientro del II Festival de Cultura Urbana d’Avilés FOCART, convoca un concursu d’idees pa la realización de trés murales, en trés allugamientos distintos de la ciudá, mientres los diez díes de celebración del certame, que va tener llugar del 24 de xunu al 3 de xunetu.

En palabres de la conceyala de Cultura, Yolanda Alonso, “el nuesu oxetivu ye potenciar la cultura, impulsar la producción artística, contribuyir a dotar de personalidá distintos espacios d’Avilés y facilitar la participación de ceadores, artistes, colectivos, entidaes, sociedaes, grupos, asociaciones xuveniles y ONGs”. Alonso añedió que les obres, una vegada realizaes, “van reforzar la imaxe d’Avilés y van  suponer una ufierta artística accesible de manera gratuita y permanente”. De la mesma, mientres la so execución, nel marcu de FOCART, va valorase la participación activa del públicu que va poder asistir de forma llibre al procesu.

Una propuesta que sofita, promociona y aguiya la creación artística en base a los modelos actuales del arte contemporaneo, potenciando’l so espardimientu y l’acercamientu a la ciudadanía, ayudando a persones (físiques o xurídiques) creadores y entamadores que promuevan y lleven a cabu tou tipu d’actuaciones artístiques.

Escoyéronse trés espacios distintos, con temátiques bien concretes pa cada unu d’ellos: y que van poder cuntar con hasta 3.000 euros d’ayuda a la so realización, en función de la modalidá escoyida. Son los siguientes:

• Modalidá A. Murales del zarru del Centru Cultural de Los Canapés, dedicaos al 90 aniversariu de l’Asociación Atlética Avilesina, nos que tean presentes los cuatro deportes referencia de la entidá: atletismu, baloncestu, balonmano y piragüismu. Va Cuntar con una ayuda máxima de 1.500 euros.
• Modalidá B. Mural de la cai del Muelle, zarru del antiguu ambulatoriu de Llanu Ponte, dotáu con un máximu de 1.500 euros. La temática, escoyida por un grupu de trabayu del Conseyu de la Muyer, va ser:
  • Muyeres esenciales na sociedá. Arriendes de la pandemia constatóse cómo hai una serie de trabayos feminizados y oficios realizaos mayoritariamente por muyeres, dellos invisibilizados, ya imprescindibles nel día ente día de la sociedá.
  • Violencia sexual que sufren neñes y muyeres, ensin capacidá de decidir, yá sía nel ámbitu de pareya, llaboral, familiar…
  • Muyeres representatives del arte, cultura y hestoria d’Avilés que tuvieron invisibilizadas y con poca presencia na ciudá.
• Modalidá C. Mural allugáu nel conocíu como Puentín de Llaranes/La Rocica, sobro’l que la pasa’l tren y al traviés del cual apuértase a Llaranes. La temática va dir d’acordies cola hestoria del barriu, y va ser industrial, en referencia Ensidesa, la fábrica que tresformó pa siempres Avilés y alma máter del pobláu siderúrugico. Va Cuntar con una dotación máxima de 3.000 euros.

Más información