Tele 5 nun va participar na gala de los Goya por un polémicu patrociniu

La cadena de televisión Tele 5 nun va participar nin va cubrir la gala de los premios Goya el próximu sábadu, 4 de febreru por facer patente la so disconformidá cola presencia como patrocinador de la ceremonia de Saphir, una empresa dedicada al mundu de los arumes que foi condergada por plaxu.

La cadena fixo pública la so decisión al traviés d’una nota na cuenta de Twitter de los servicios informativos. Na nota, el grupu de Telecinco, productor d’una de les favorites d’esta edición, “Una bisarma vien veme” -12 nominaciones-, asegura que nun van asistir “porque’l patrocinador d’esta edición ta condergáu en firme per competencia deslleal dende’l pasáu mes d’avientu”.

Amás nun van dar cobertoria informativa “dalguna” al eventu, nel que Telecinco Cinema tien un total de 19 candidatures, con películes como “Kiki” y “Cien año de perdón y el documental “Omega”.

El Tribunal Supremu encamentó’l pasáu mes d’avientu al grupu Saphir Parfums a dexar d’usar y comercializar les marques de Puig y a indemnizar a esta firma al considerar qu’incurre en competencia deslleal colos sos arumes, confirmando la decisión de 2015 de l’Audiencia Provincial d’Alicante. El fallu recurríu aseguraba que “ye induldable” la esistencia d’un “eleváu grau de semeyanza” ente los arumes orixinales de Puig y los comercializaos pola firma demandada, qu’atrai al consumidor ensertando etiquetes identificatives nos espositores.

Fuentes de l’Academia de Cine acoyéronse al comunicáu que fixeron públicu arriendes de esa sentencia y ratifíquense en que va caltener al grupu como patrocinador. El resolvimientu xudicial, aportunaron, ye “posterior a la firma del contratu” con Saphir, que patrocina los Goya dende va dos años -esti va ser el terceru-.