SUATEA critica la hipocresía de la Conseyería d’Educación

L’anuncia de la Conseyería d’Educación de que va solicitar al Ministeriu d’Educación la especialidá docente de Llingua Asturiana contrasta col so maltratu permanente a la materia na opinión de SUATEA qu’esta selmana asoleyaba un duru comunicáu criticando l’anuncia: “Tando acabante d’anunciar que ta iguando la documentación pa solicita-y al Ministeriu d’Educación y Cultura el reconocimientu de la especialidá docente de Llingua Asturiana, pervieya reivindicación dende va trenta años, tantos como hai de presencia del asturianu na enseñanza, la Conseyería y el gobiernu asturianu pretenden agora mangase la medalla de grandes defensores de la llingua del país, cuando la rialidá ye que la política de l’actual Conseyería d’Educación ye la del maltratu permanente a la materia, a quien la imparte y a quien la recibe”.

Pal SUATEA ye abondo “llarga la llucha que los docentes d’asturianu y gallego-asturiano lleven faciendo p’algamar un reconocimientu asemeyáu al del restu del colectivu docente, polo demás bien maltratáu por esti gobiernu. Xeneralización de les medies xornaes, horarios antipedagóxicos, males artes pa desincentivar la matriculación de los estudiantes, desamparu permanente… Bona parte d’esta situación achacábase y achácase a l’ausencia d’una especialidá docente tanto en Primaria como en Secundaria que dignificara la materia y estabilizara’l so profesoráu al traviés d’un procesu de concursu-oposición, yá que’l 95% del mesmu ye personal interín”. La rialidá ye que, na opibión de SUATEA “siendo la especialidá imprescindible p’avanzar na dignificación, la Conseyería d’Educación pudo y puede facer muncho más pola escolarización de la llingua asturiana. De fechu, abulta paradóxico, por nun dicir hipócrita, que pretendan agora dir de defensores del idioma cuando hubo que llevalos a los tribunales pa facelos cumplir la Llei d’Usu de 1998”.

Ente lo que considera autobombu SUATEA, “ente tanta recatafila de coses presuntamente feches como actu de propaganda de cara a la Selmana de les Lletres d’esti añu, la Conseyería escaeció cómo’l so gobiernu ta afogando económicamente a la institución cimera de les lletres asturianes, l’Academia de la Llingua, cola falsa sida de la crisis”.

Dende SUATEA dicen ser conscientes de que la igua rial al problema de la llingua asturiana y del gallego-asturiano, tanto dientro como fuera de la educación, pasa inevitablemente pela so oficialidá, que, de pasu, “serviría pa cumplir el mandáu de la Constitución de 1978, o de la Carta Europea de les Llingües Minorizaes de la que’l Reinu d’España ye firmante. Mentanto, la dignificación de la llingua ha facese dando milenta pasos, de los que la especialidá ye unu d’ellos. Esti y tolos demás siguen siendo obligación de la Conseyería”.