Roncones y tambores combativos pala mani de la Oficialidá

Esti 9 de Mayu celebraráse como cada Día de les Lletres n’Uviéu una manifestación pola Oficialidá sofitada por una montonera de coleutivos políticos y sociales que fina delantre’l Campoamor enantes d’entamar l’actu cimeru del Día de les Lletres cola Xunta Estraordinaria de la Academia de la LLingua Asturiana. Y esti añu, pa facer compaña al movimientu de reivindicación llingüística nes cais de la capital dende les 19:30 hores na Estación del Norte d’Uviéu, col envís de reivindicar la oficialidá de la llingua asturiana dellos músicos de nueso tan faciendo una convocatoria especial que quier reeditar la concentración “Roncones vs Borbones”.

Pa esta manifestación, entamada como tolos años pola Xunta Pola Defensa de la Llingua, faise un llamáu a “rinchar pola nuesa llingua”. La convocatoria quier repetir el modelu de “Roncones vs Borbones”, la concentración escontra los Premios Príncipe, y nesti casu llamen a formar un pelotón de tambores y gaites combatives como parte de la protesta y reivindicación pol caltenimientu y puxu de la llingua del país.