Somos Avilés rexistra la primer moción n’Asturianu nel conceyu

L’agrupación d’electores Somos Avilés, que tien cinco conceyales nel consistoriu, fixo historia estos díes al rexistrar per primer vez nel conceyu avilesín una moción redactada en llingua asturiana. Dende la organización comenten “qu’esta práctica va ser habitual nel so proceder a lo llargo de tola llexislatura, dao que’l so enfotu ye facer del asturianu una ferramienta de comunicación avezada, tamién nel terrén alministrativu y procedimental, fuxendo d’un emplegu meramente simbólicu y/o coyuntural”.

Búscase con ello “da-y normalidá, prestixu y utilidá al nuestru idioma, más allá d’aspectos sentimentales o políticos, presentándolu como un instrumentu comunicativu amañosu y preparáu pal desenvolvimientu del llabor municipal”.

Nesti sen, la primer moción en llingua asturiana trata de la conocida como «Llei mordaza», redactada y aprobada pol Partido Popular y qu’entró en vigor apocayá. Nella esíxese la derogación darréu de la Llei de Seguridá Ciudadana y de la Reforma del Códigu Penal, la dimisión del Ministru del Interior, Jorge Fernández Díaz, polos sos postulaos contra derechos como’l d’espresión o manifestación, ente otros, qu’enzarra’l testu llexislativu y pídise al gobiernu municipal que, mentanto esto nun asoceda, amenorgue la so aplicación a nivel local, con estes palabres: “Amosar el compromisu d’esti consistoriu nel cumplimientu de les funciones de velar pola seguridá pública, siempre de manera coordinada coles autoridaes competentes, y el nuestru refugu a que’l funcionariáu públicu de los cuerpos policiales seyan remanaos como elementos de represión de la protesta social”. La moción va debatise ente los distintos grupos municipales nel próximu plenu ordinariu, que va entamase pal xueves d’esta selmana.

Otra manera, Somos Avilés tien la intención de presentar pa la so aprobación y puesta en marcha delles midíes de política llingüística a desenvolver nel conceyu na presente llexislatura, como prueba del so compromisu col asturianu y los derechos civiles de la ciudadanía avilesina.