Skontra fina la presentación de “Foguera” esti payares n’Uviéu

La banda va tener la so próxima cita’l 28 de payares nel Raposu Rock d’Uviéu, finando la presentación de ‘Foguera’ entantes d’encarar la xira de 2016.

El pasáu 29 de mayu salió a la cai’l cuartu trabayu de Skontra, un discu que destaca por ser el más ambiciosu que llanzaron nos sos quince años de trayectoria. Tolos detalles tán curiaos y por eso agora la banda presenta más novedaes en rellación a él: yá se pue ver el videoclip de “La Foguera”, mercar el discu n’edición vinilu y se sumen nueves feches a una xira con contratación abierta de cara a esti cursu.

“La Foguera” foi’l primer single del discu y ye agora’l nuevu videoclip de la banda. Una tema qu’a golpe de punk-rock melódicu y con protagonismu de la gaita tresmite un mensaxe de llucha y dignidá. Tien amás un calter colectivu: dellos activistes de colectivos sociales asturianos ponen la so cara pa denunciar la represión que supón la Llei Mordaza y nel cantar canten miembros de Bastards on Parade, The Potes y Nuria Martí en gallegu, euskera y catalán.

Esti tema ye una amuesa de lo que contién el cuartu trabayu de Skontra: trece cortes que van de menor a mayor intensidá pasando pol punk, folk, rock y reggae; too ello entemecíu con un mensaxe que llama a resistir y a siguir lluchando. Agora ‘Foguera’ tamién pue mercase al traviés de la web del grupu en vinilu por un preciu de doce euros ó de quince (xuntu al CD). Amás, el discu ta disponible en libre descarga xunto a tola discografía de la banda.

Tres de llevar el so directu a fiestes de L.lena, de Vitoria-Gasteiz y a festivales como’l Beltane Fest, el XII Asturies Nun Escaez, el festival Ástur-Romanu de Carabanzo o los III Alcuentros Populares de Bimenes; la banda va tener la so próxima cita’l 28 de payares nel Raposu Rock d’Uviéu. Va acabase asina la primer parte de la presentación de ‘Foguera’, encarando la xira de 2016 con vistes a facer nuevos festivales y a pisar más sales de too l’Estáu.