Skama la Rede y La Col.lá Propinde toquen güei en Ciañu

Redacción.

Güei vienres, 8 de xunu a les 22:00 hores, Skama la Rede y La Col.lá Propinde van tocar nes fiestas de Ciañu. Les actividaes de les fiestas entamen güei col pregón Francisco González Zapico y van tener nelles especial importancia les actuaciones musicales con Skama la Rede y La Col.lá Propinde. Per otru llau, el sábadu va actuaciones de Los Brincos y Los Mismos, amás de verbenes tolos díes, marches ciclistes y concentración de motos. Les fiestas del Corpus Christi de Ciañu d’esti añu 2007 rematen cola xira del llunes y una espicha nel cine Ideal.

La Col.lá Propinde ñaz a principios del añu 2000 col envís de facer un folk que, ensin tar lloñe de les bases tradicionales de la música asturiana y raíces celtes averase a les nueves alternatives dando como resultáu un soníu frescu, folixeru y mui comprometíu coles realidades sociales. Tienen dos discos asoleyaos col sellu discográficu L’Aguañaz, L.l nel añu 2003 y Güeria, discu que saliera va poco al mercáu, onde la fusión se fai sentir xunto cola música tradicional asturiana.

Skama la Rede, grupu formáu en setiembre de 2003, ñació de la xuntanza de dellos músicos de la zona del Cabu Peñes col enfotu de formar un grupu de bases ska con influyencies rock, punk y folk, emplegando la trompeta y la gaita asturiana nos sos temes. Dempues de publicar La Nuesa Historia nel añu 2005, Skama la Rede ta acabante de poner na cai Echaos a la mar, el so segundu disco. Nesti segundu álbum y a lo llargo de doce cantares afonden na propuesta del primer discu y xuben el nivel de soníu.