Sigue la Selmana Grande de Xixón con Mojo Project y el Dúo Dinámico

Redacción.

La Selmana Grande de Xixón sigue un día colos sos conciertos nocherniegos. Y güei miercoles van continuar coles actuaciones de ‘Mojo Project’ a les nueve la nueche na Plaza Mayor y del Dúo Dinámico a les once nel escenariu instaláu en Poniente.

‘Mojo Project’ ye un grupu madrilanu nel que fusionen estremaos ritmos y qu’esti branu presenta’l so trabayu últimu ‘Revolution’, que salió al mercáu va poco más d’un añu. El grupu canta en castellán y dalgún tema n’ingles.

En cuantes al Dúo Dinámico, formáu por Manolo y Ramón nun se pueden dicir munches coses que nun seyan conocíes pol públicu. Estos dos amigos lleven trabayando xuntos dende poco anantes de los años 60 y nunca baxaron de los escenarios. Nesti tiempu consiguieron esitos musicales como ‘Quince años tiene mi amor’ o ‘Quisiera ser’, títulu esti últimu del musical que va repasar les so vides –que va estrenase esti mesmu añu.

Otres actuaciones que van poder vese a lo llargo de la Selmana Granve van ser Kula Shaker, Los Redentores o Tony Allen ente otros. Ocho díes nos que Xixón va ser la capital de la música y la fiesta n’Asturies.