San Mateo 2015: “playback” en llugar de conciertos

Una bona representación de músicos asturianos averáronse esti miércoles al Cá Beleño pa defender la música en vivu n’Uviéu y sofitar a los hosteleros que programen conciertos. Aconceyaron cola vicealcaldesa Ana Taboada y el conceyal d’Urbanismu, Ignacio Fernández, les sos moliciones y reclamaciones, dempués de que’l Conceyu prohibiera los conciertos nel Cá Beleño.

Nel nomáu chigre taben artistes de la escena asturiana tan nomaos como Nacho Vegas, Toli Morilla, Pablo Moro o Rafa Kas, qu’actuaren dalguna vegada ellí,  y que, xunta los dueños de los negocios, facíen l’anuncia de que van entamar una recoyida de firmes pa impulsar una iniciativa lexislativa popular que desenvuelva l’actual normativa autonómica, regulando pa siempres les actuaciones en vivu nos chigres musicales. Al mesmu tiempu, los músicos tamién ficieron anuncia de que preparen un llargu cartelu de conciertos en “play back” pa San Mateo, con grupos de toa Asturies interpretando música enlatada. Asin, dicen que van poner n’evidencia una llei que dexa que, respetando les llendes de ruiu, suene música nun aparatu y penalice esa mesma música si se fai en directu.

La idega de presentar una iniciativa parlamentaria foi de la propia Ana Taboada porque como desplicó los conceyos xixilen el cumplimientu de la norma, pero la lexislación y el so desenvolvimientu ye competencia autonómica.

El propietariu del Cá Beleñu, Franky Delgado, dixo tamién que yá recoyeren más de dos mil dirmes y van siguir axuntando más.