IX prioriza la política deportiva

Izquierda Xunida esixó esti miércoles priorizar una nueva política deportiva qu’arranque con un cambéu de la obsoleta llei de deporte del Principáu d’Asturies. Gaspar Llamazares reclamó, amás, la puesta en marcha del Plan Integral pa l’Actividá Física y el Deporte (A+D) estatal, que tien por oxetivu cimeru garantizar al conxuntu de la población l’accesu universal a la práctica deportiva calidable.

Según esplicó Llamazares, l’impulsu a un nuevu marcu regulador ye vital: “Una primer crítica ye qu’a lo llargo de los últimos gobiernos nun tuvimos realmente política deportiva. Tuvimos unos gobiernos sedentarios que se dedicaben a dar medayes y subvenciones, pero que nun teníen política deportiva y muncho menos teníen una política deportiva dientro de l’actividá educativa y tampoco dientro de les polítiques de salú”.

La educación y la salú son les dos cuestiones cimeres pa dar rempuesta a les propuesta del Plan A+D que, como esplicó Llamazares nuna rueda de prensa, nun fueron desenvueltos n’Asturies. Frente a l’atonía, IX propón que “el deporte sía una prioridá tamién nesta llexislatura y non solamente agora na estructura de la Conseyería, sinón dende’l puntu de vista lexislativu”.

Rolando Díaz, unu de los responsables de la Área de Deportes d’IX, presente tamién na rueda de prensa, informó que nestos momentos, n’Asturies, el sobrepesu infantil afecta a un 26,3% de la población ente 2 y 12 años. Y non yá ye cuestión de salú sinón tamién educativa, porque “la mesma práctica del deporte vese torgada por actitúes pocu edificantes per parte de técnicos y entrenadores que, nun 93,3% de los casos, reacciona de forma negativa ante un erru arbitral, a lo que se suma l’usu d’un llinguaxe non educativu nun 73,3% de les ocasiones y hasta inclusive palabres porcaces nel 26,7%”.

Rolando Díaz esplicó que la Llei Asturiana data de 1994, siendo un calcu de l’aprobada n’España en 1990, y que s’empobinaba más al deporte d’élite, dada la proximidá de les olimpiaes.