Samartín del Rei Aurelio celebra “El descorche” esta fin de selmana

La Sociedá Cultural y de Fiestes de L’Entregu celebra esta fin de selmana, los díes 25, 26 y 27 de mayu nel Parque de La Llaguna una nueva edición de la folixa del Descorche, na que van participar once llagares que van ufiertar preba de sidra de baldre, amás d’otres munches actividaes como’l mercáu tradicional, actuaciones musicales y atracciones infantiles.

El Serviciu de Normalización Llingüística d’esti conceyu albidra esta “una bona escusa pa volver a da-y presencia a los materiales de la campaña “La sidra, d’Asturies”, cola que pretenden “recuperar el pallabreru y les espresiones rellacionaes col mundu la sidra”. Asina, espliquen “cuando bebas un culín valora si “tien cuerpu”, “ye de bon palu”, “fai bon vasu” o pol contrariu, “ta filao”, “ye puxarra” o “ye de piescu”. La cartelería d’esta campaña con espresiones como estes va tar mui presente nestos díes na folixa del Descorche.