Polémica pol Díi de la Mocedá Revolucionario 2008, entamáu por Darréu

La mocedá independentista y socialista de Darréu fizo públicu un comunicáu nel que quixeron facer la so valoración de los actos organizaos el sábadu pasáu pola organización independentista en Llangréu. Pa la organización los actos fueron “un ésitu políticu, organizativu y de participación”.

Esti comunicáu vieno a contestar “a la engarradiella pública que se traen el PP y el PSOE de Llangréu pa ver cual de ellos ye’l más represor”. Dende Darréu entienden que “los dos mienten y que dambos xugaron el mesmu papel: el PSOE primero intentando que nun se cellebrara’l conciertu y el PP dempués criminalizándonos a los organizadores”.

Los responsables de Darréu comenten “El PSOE de Llangréu miente cuando afirma que respeta la llibertá d’opinión porque nosotros sabemos que fizo lo imposible y punxo tolos problemes llegales del mundu pa que Darréu nun pudiere facer el conciertu teniendo que ceder inevitablemente al ver que Darréu cumplía tolos requisitos llegales, incluso los que nun dexixen a naide, sólo a nosotros”.

El PP, per otru llau, viendo qu’el PSOE, contiua’l comunicáu, “nun pudo parar la celebración del eventu porque too yera perfechamente llegal, intentó la tautica de la criminalización inventándose supuestes pelees y incidentes que nun esistieron”. Amás dende Darréu creen qu’“utilizar argumentos antidemocráticos como pidir espresamente la prohibición de los actos alegando motivos puramente ideolóxicos”, como según la organización foi “por ser una manifestación d’independentistes y por facer un conciertu de grupos con lletres amorales”.

Nesti asuntu recuerden dende Darréu, “nin la ambulancia que contratemos nin la unidá de proteción civil tuvo que facer ninguna intervención durante los actos y que la mesma Policia Llocal de Llangréu reconoció que nun se xeneró ni un solu incidente antes, durante o dempués del conciertu”.