Patty Jenkins volverá dirixir ‘Wonder Woman’

La cineasta Patty Jenkins llegó esta selmana a un alcuerdu col estudiu Warner Bros pa dirixir la continuación de ‘Wonder Woman’, unu de los grandes ésitos del añu. Según informó la edición dixital de Variety, Gal Gadot volverá ponese na piel de la superheroína y la cinta tien previstu llegar a les sales n’avientu de 2019.

Enantes d’esta confirmación, la publicación yá indicara que Jenkins llevaba tiempu trabayando nel guion d’esta película con ayuda de Geoff Johns, l’encargáu de supervisar l’universu de películes de DC Comics pal estudiu. ‘Wonder Woman’ lleva recaldaos más de 400 millones de dólares (332 millones d’euros) n’Estaos Xuníos y más de 800 millones (665 millones d’euros) en tol mundu.

Tratase de la cuarta película del universu estenedíu de DC, inauguráu en 2013 con ‘L’home d’aceru’. Dempués llegaron ‘Batman v Superman: L’amanecer de la xusticia’ y ‘L’escuadrón suicida’. ‘Wonder Woman’, con 100,5 millones de dólares (87,3 millones d’euros), foi’l meyor estrenu de la hestoria al cargu de una directora, superando l’anterior marca de Sam Taylor-Johnson (‘Cincuenta solombres de Grey’), con 93 millones de dólares (77,3 millones d’euros) en 2015.

La cinta, protagonizada por Gal Gadot, Chris Pine, Robin Wright y la española Elena Anaya, cunta l’orixe de la superheroína desque yera conocida como Diana, princesa de les Amazones, na idílica isla de Themyscira. Ellí va empezar el so entrenamientu pa convertise nuna poderosa guerrera, hasta qu’en el so vida crucia un pilotu que-y afaya’l conflictu bélicu que se ta produciendo nel mundu y decide abandonar el so llar pa lluchar nel bandu aliáu de la I Guerra Mundial.