Ochobre trai la edición más internacional del Salón de les Sidres de Gala

Los prósimos 30, 31 d’ochobre y 2 de payares cellebaráse la edición más internacional fasta agora del Salón Internacional de les Sidres de Gala (SISGA) con una Cena Gala nel Restorán El Duque y una Tastia Abierta nel Centru de Cultura Antiguu Istitutu de Xixón.

Añu ente añu, el SISGA va medrando en númberu de participantes internacinales, cuntándose pa esta edición cola presencia de llagareros de Suecia, Eslovaquia, Chequia, Irlanda, Holanda, Italia, Bretaña, Inglaterra… y quiciás tamién de México.

El restorán El Duque acoyerá la Cena Gala, y podrán maridase les meyores sidres colo meyor de la gastronomía. Amás esti añu, la xornada de Tastia Abierta tendrá llugar nel Centru Cultura Antiguu Istitutu de Xixón, lo que los organizadores camienten que ye “un lluxu que rescamplará ainda más la calidá del eventu, facilitando la participación de les persones interesaes”.