Nuria Espert algama’l Premiu Europa de Teatru especial

L’actriz Nuria Espert (1935) foi reconocida esta selmana col premiu especial del Premiu Europa de Teatru pola so estraordinaria trayectoria nos campos de la interpretación y la dirección escénica como pol so defensa de les llibertaes”.

L’actriz va recibir el so galardón mientres la celebración del XVII Premiu Europa de Teatru (PET) y la XV edición del Premiu Europa de Realidaes Teatrales (PERT), que se va celebrar ente’l 13 y 17 de payares en San Petersburgo. El nome de Nuria Espert “yá foi propuestu nel so día” por José Monleon (1927-2016), miembru del Xuráu y fundador del Institutu Internacional del Teatru Mediterráneu, recuerda’l comunicáu.

El Premiu Europa de Teatru promueve la interdisciplinariedá, la integración y la cooperación ente’l teatru y otres artes nel contestu de les actuaciones en vivu pa promover la conocencia y l’espardimientu d’esi arte nel continente. Dientro del Premiu Europa de Teatru, concédese amás una reconocencia especial a una personalidá que combinara, a lo llargo de la so carrera, el talentu artístico cola proyección internacional y el compromisu éticu y anguaño recayó en Espert, que completa xuna nómina na que yá figuren Melina Mercouri, Vaclav Havel o Wole Soyinka. Los artistes galardonaos van presentar en San Petersburgo los sos espectáculos y van participar en distintos alcuentros dedicaos a la so trayectoria teatral cola crítica y la prensa internacionales.

El Premiu Europa de Teatru celebró la so primer edición en 1987 na localidá siciliana de Taormina y, darréu, “creció n’importancia de la mano de Melina Mercouri y de Jack Lang, entós ministru francés de Cultura y actual Presidente del Premiu”. En 2002, el galardón foi reconocíu pol Parlamentu Européu y pol Conseyu Européu, y escoyíu en 2017 como proyectu pa la inauguración del Añu Européu del Patrimoniu Cultural 2018.

Tres nueve ediciones en Taormina, el Premiu Europa pal Teatru convirtióse nun premiu itinerante. La décima edición foi en Turín, les siguientes dos en Tesalónica, Wroclaw, San Petersburgo y Craiova; l’añu pasáu en Roma y anguaño de nuevu en San Petersburgo.