Nuevu plazu de 20 díes pa inscribise nes oposiciones de maestros

La Conseyería d’Educación abre un nuevu plazu de 20 díes dende esti miércoles 10 de payares pa presentar les solicitúes pa les oposiciones de maestros, previstes en xunu con 398 places. Quien presentaren la so instancia nun van tener que volver formalizala, anque van cuntar cola posibilidá de modificar, completar o incorporar nueva documentación.

Esta información foi treslladada a los sindicatos nuna xunta na que s’informó de les correcciones efectuaes tres los erros apaecíos na convocatoria. Los cambeos faen referencia a los puntos por esperiencia docente previa (el máximu va ser de 5); al sortéu de la tema de la parte B de la primer prueba (teórica), nel que se van estrayer dos boles en cuenta de trés, y al máster del profesoráu, que va ser computáu como méritu.

CC OO alvierte de que va impugnar la convocatoria «si nun se modifiquen aspeutos como que l’aspirante que tien dos titulaciones vease obligáu a presentar la de grau y nun pueda decidir si presenta la diplomatura, en función de lo que sía más acorde a los sos intereses». UXT repitió’l so «malestar pol baramentu de la convocatoria, ensin esperar a les negociaciones que se van a desenvolver a escala estatal y bien probablemente modifiquen el sistema d’accesu a la función docente». Nesta llínea manifestóse CSIF, al tachar de «precipitáu’l resolvimientu cuando ta por ver cómo se van concretar los procesos d’estabilización d’interinos de les alministraciones públiques».