N’ast denuncia “constante hipocresía” n’Izquierda Xunida

L’asociación N’Ast denuncia lo qu’albidra ye “constante hipocresía d’IX nel tema llingüísticu” y aconseyen a la formación “que dexe de facer el fatu con propuestes de cara a la galería y qu’apueste nidiamente pola oficialidá del asturianu”.

La nota emitida por N’ast apaez por mor de que va unos díes, el grupu d’Izquierda Xunida nel Conceyu d’Uviéu presentó una proposición urxente pal so alderique nel Plenu municipal na que pide a los xestores del conceyu carbayón qu’adopten l’usu del asturianu con normalidá, dempués de que’l coleutivu Iniciativa pol Asturianu denunciara que-y prohibieren presentar un documentu nesta llingua nel Rexistru municipal.

Pa N’ast, les declaraciones del voceru de la coalición n’Uviéu, Roberto Sánchez Ramos, desplicando que l’enfotu de la proposición ye “democratizar la vida municipal y garantizar un drechu” añadiendo que “yá ye hora de que’l nuesu conceyu entienda l’usu del asturianu como daqué normal”. Por embargu, en N’Ast camienten “que ye precisamente IX quien nun acaba d’entender l’usu del asturianu como daqué normal”.

N’ast afirma que nun cansen “de remembrar que cuando IX tuvo responsabilidaes de gobiernu n’Asturies siempres dexó’l tema llingüísticu aparcáu, lo mesmo que cuando gobierna nos conceyos, bien en solitario o xunto a otres formaciones polítiques, y que, a la hora la verdá, la oficialidá de la llingua asturiana nunca nun formó parte de les sos condiciones a la hora d’afitar pautos de gobiernu”.

Poro, dende N’Ast aconseyen a IX que “dexe de facer el fatu con propuestes de cara a la galería, coles qu’a naide nun engaña y que namás que se-y ocurren cuando se fai públicu dalgún ataque nidiu a los drechos de los asturianos”. Amás aprovechen pa solidarizase con Iniciativa pol Asturianu, y piden a IX “que nos conceyos nos que tienen representación y/o gobiernen planteguen l’aprobación d’una Ordenanza Municipal sobre Usu del Asturianu, con un conteníu real, y la defensa de la oficialidá na Xunta Xeneral d’Asturies”.