Muñeco Vudú presenta’l so nuevu discu “Sigamos vivos” en Mieres

La presentación esti vienres a les 20 hores nel Centru Cultural de Mieres del nuevu álbum de Muñeco Vudú, que lleva por títulu “Sigamos vivos” va ser el prólogu de la que va ser una gran xira y un gran añu pal grupu asturianu.

“Sigamos vivos” ye un viaxe vital en forma de vuelu rasu, compuestu por 11 cantares grabaos ente los estudios ACME d’Avilés, Ovni de Llanera y Satélite d’Uviéu, so la producción, conjuntamente con Ivo Pérez, de Miguel Herrero, Pablo Martínez Pérez y Jorge Oteru, respectivamente.

La hestoria d’esti discu empieza a cuntase dende la portada, como los discos d’antaño, nos que’l continente yera tan importante como’l conteníu. L’artista uvieín Toño Velasco entiesta, nun golpe d’imaxe, cartón y llenzu, toa xuna declaración d’intenciones dende la primera toma de contactu col discu: unos guantes de boxéu reposando de la llucha pola vida sobro un pie d’un micrófonu antiguu, con una bola del mundu de fondu y la vida asomando en forma de flor.

Muñeco Vudú ye un ente independiente, alloñáu de modes, de los fusos y el costumes de les corrientes musicales que los esvien del so camín. Escurren, crean y producen la mayoría de les sos videoclips, tollo fechu d’una manera bien coherente col so pensamientu y col mensaxe que quieren tresmitir cola so música.

Como dixo Santiago Alcanda na so pequeña reseña pa Radiu3, “Sigamos Vivos” ye un discu redondu, en tolos sentíos. 11 cantares que tresverten sentimientu y maduror, que sobrevuelen personaxes que rin, que se angustian, que faen un viaxe d’ida escontra la paternidá, que rellaten hestories de llucha, de supervivencia y de despidida: la mesma vida.

Ivo Pérez (cantares, guitarra acústica y voz) asítiase al mandu de xuna banda que destaca pos la so solvencia nos estudios de grabación, pero que s’amuesa imparable nel escenariu, nel directu. Al pie de él, Borja García (guitarra eléctrica solista), Borja Sauras (batería, tambores y coros), Sergio Díaz (baxu y coros), Alfredo González (teclaos y coros) y Ángel Miguel (guitarra eléctrica y coros)

Muñeco Vudú va presentar esti álbum en directu’l vienres 2 d’avientu, a les 20 nel Centru Cultural de Mieres, con entrada llibre hasta completar aforu, y el sábadu 3, a les 21.00h, na sala Black Bourbon de Llión, mientres perfilen la xira que va tener llugar mientres tou 2023.