Ministeriu y comunidaes van alcordar güei cómo preparar el final del cursu

La Conferencia Sectorial, que preside la ministra Isabel Celaá y que volverá axuntar a les alministraciones esti miércoles, día 15, tien d’apautar como preparar el final de cursu.

Énte la incertidume creada pola prórroga del confinamientu pol coronavirus y cómo se va a encarar el final del cursu escolar, había munches mires puestes na Comisión Xeneral d’Educación, integrada por representantes del ministeriu y de les comunidaes autónomes. Sicasí, más qu’alcuerdos, la xunta telemática d’esti llunes sirvió pa faer propuestes, avanzar y preparar la Conferencia Sectorial, que preside la ministra Isabel Celaá y que volverá axuntar a les alministraciones el miércoles, día 15.

Ye güei cuando s’espera que’l ministeriu proponga un marcu común, con orientaciones, pa encarar el final del cursu y l’evaluación del últimu trimestre. La directora xeneral d’Ordenación, Evaluación y Equidad educativa, Paula García, participó ayeri na videoconferencia y, nesti sentíu, volvió sorrayar que’l Principáu caltien «un diseñu curricular basáu nes competencies clave». La idea ye reforzar conteníos, ensin avanzar materia, salvu en segundu de Bachilleratu.

Tamién s’avanzó nel proyectu d’orde que modifica la prueba d’accesu a la Universidá, la EBAU. Ensin alteriar la estructura de los tipos d’exame, va dar más opciones a los alumnos pa «llograr el máximu rendimientu». Coles mesmes, dexen too llisto pa camudar el real decretu qu’aplaza les oposiciones (nel casu d’Asturies, de Secundaria). Precisamente ayeri, l’alumnáu del Máster de Formación del Profesoráu de la Universidá d’Uviéu reclamó l’apertura d’un nuevu plazu d’inscripción pa presentase a les de 2021 pos, en casu contrariu, nun podría optar hasta les de 2023, «daqué inxustu al tener la titulación necesaria».