Migoya sostién que l’asturianu “esmolez” al Gobiernu, pero reitera que nun habrá coficialidá antes de 2007

“Ye claro que l’alcuerdu de Gobiernu nun prevé la coficialidá nesta llexislatura”. Con eses pallabres reiteró esta mañana la conseyera de Cultura, Ana Rosa Migoya, que la declaración de la llingua asturiana como idioma coficial nun entra nos planes del Executivu a lo menos antes de 2007. Fízolo darréu de mantener una xuntanza con miembros del Comité internacional pola salvaguarda de los drechos llingüísticos n’Asturies, que-y entregó un informe nel que se destaca la necesidá imperiosa de declarar, o a lo menos prever, la coficialidá pa garantizar la sobrevivencia del idioma.

Nuna comparecencia pública, Migoya aseguró que la situación del asturianu “esmolez” al Gobiernu, y como rempuesta a esa preocupación anunció la inminente aprobación del Plan de Normalización Sociollingüística de la Llingua Asturiana, que según afirmó aprobaráse formalmente “nos últimos Conseyos de Gobiernu d’esti añu, o nel primeru de 2005”.

Nesi documentu, cuyos conteníos ya inspiración adelantó Asturnews yá nel mes de xunu, la titular de Cultura ve’l preséu fundamental de la política llingüística del Executivu, que defendió como “transversal”. De fechu, Migoya sorrayó que parte de les conclusiones del informe que güei-y entregaron los espertos europeos coinciden colos plantegamientos del Plan de Normalización, que persigue, precisó la conseyera, “frenar la desapaición de la llingua común”.

Na xuntanza colos miembros del comité internacional participaron amás la directora xeneral d’Ordenación Académica, Dolores Guerra; el director de la Oficina de Política Llingüística, Ramón D’Andrés, y el conseyeru de Xusticia, Seguridá Pública y Relaciones Esteriores, Francisco Javier García Valledor, quien pidió que la llingua nun seya un elementu de confrontación ente los asturianos y llamó al PP a participar nun consensu, nesti puntu, na prósima reforma del Estatutu d’Autonomía.

Cola reunión con responsables del Gobiernu, el Comité internacional pola salvaguarda de los drechos llingüísticos n’Asturies completa dos xornaes d’alcuentros con representantes de la vida política, social y cultural del Principáu, depués de cellebrar na tarde d’ayeri entrevistes cola presidenta de la Xunta Xeneral, María Jesús Álvarez, y con responsables de los tres grupos políticos con representación nel Parlamentu.

Archivu. Especialistes europeos reclamen n’Uviéu mayor “visibilidá” pa la llingua asturiana