La Sociedá d’Autores asegura que quier un alcuerdu “razonable y equitativu” col Intercélticu d’Avilés

Un alcuerdu “razonable y equitativu”. Esi ye’l pactu que quier pesllar la Sociedá Xeneral d’Autores y Editores, en pallabres del so responsable xurídicu n’Asturies, Francisco García Hidalgo, pa cobrar los drechos d’autor del Festival Intercélticu d’Avilés. Los organizadores del eventu tienen yá llista una propuesta de liquidación na qu’asumen pagar el 10 por cientu sobre’l presupuestu sólo de dalgunos de los recitales.

En principiu, esa pretensión casa namás en parte col plantegamientu de la Sociedá d’Autores, que según precisó García Hidalgo mantién la so esixencia de cobrar el 10 por cientu del “presupuestu de gastos necesarios” pa ca ún de los conciertos que se cellebraron na última edición del Intercélticu, en xunetu pasáu.

La SXAE inda nun fala de cifres concretes. El so representante xurídicu sorrayó la voluntá de la entidá d’algamar un alcuerdu amistosu y declaróse a la espera de recibir la correspondiente declaración de gastos, que nos prósimos díes unviarán los responsables de l’asociación Esbardu, organizadora del festival avilesín, cola propuesta de sufragar los drechos d’autor “siempre qu’haiga que pagar”. Con eses pallabres, el presidente d’Esbardu, Juan Casas, matiza que los entamadores del Intercélticu proponen paga-y a la SXAE el porcentaxe conveníu sólo nos casos de los recitales que, a xuiciu de los organizadores, xeneren drechos d’autor, una llista de la que quedaríen escluyíos los conciertos de música d’autoría estrictamente tradicional.

Un puntu adicional separta les visiones d’Autores y Esbardu. Mientres que García Hidalgo sostién que “la negociación tien que ser global” y reclama un pactu retroactivu sobre los drechos d’autor d’ediciones anteriores del festival, Juan Casas remembra que l’alcuerdu algamáu ‘in extremis’ na puerta’l xulgáu na viéspora l’aniciu del festival prevía namás la negociación al rodiu de los drechos d’autor xeneraos pola edición de 2004.

La octava edición del Intercélticu d’Avilés y Comarca aconceyó ente’l 16 y el 27 de xunetu a unos 20.000 asistentes, según el balance de los organizadores, nun añu que supuso un importante saltu cualitativu pal eventu, qu’axuntó a 850 participantes y aumentó la so duración respecto a 2003.

Archivu. La Sociedá d’Autores retira la demanda contra l’Intercélticu y negociará un cobru a la baxa