Mieres gana puntos p’acoyer el grau de Deporte

El rector de la Universidá d’Uviéu, Santiago García Granda, atopábase ayeri nel campus de Barredo y referíase al discutiniu qu’hai alrodiu del Grau de Deporte dexando afitao que Mieres tendrá un papel importante nel mesmu.

«Dimos una vuelta de tuerca más pa poner a la comisión -que trabaya nel diseñu del plan d’estudios- a trabayar alliniada a les directrices de la Aneca (l’Axencia Nacional d’Evaluación de la Calidá y Acreditación) y, poro, esperamos resultancies. Les instalaciones de Mieres tán configurándose como un llugar aparente por que tenga una parte bien importante d’esta titulación». Pero trátase, siguía, de configurar estos estudios pa dempués ponelos en funcionamientu «colos recursos que tenemos».

La comisión d’estudiu d’esta titulación atopase na fase de diseñu de «un plan curiosu», que s’estreme del restu de graos del deporte que s’imparten n’España. Y, según remarcó’l rector, Asturies tien enforma qu’ufiertar nesti sentíu. Otra de les cuestiones que se va estenando ye’l númberu de profesores que se van precisar. Sobre cuándo va tar llista tola documentación pa presentala al Conseyu de Social y al Conseyu de Gobiernu del Principáu, pa unviala dempués a la Aneca, García Granda señaló que taría llista a lo llargo de la próxima primavera. La intención yera, nun principiu, que pueda empezar a impartise’l cursu 2019-2020. El so costu ta envaloráu nun millón d’euros al nun tener que construyir edificios.

El máximu responsable de la institución académica faía estes declaraciones nel actu inaugural de les undécimes xornaes d’Innovación Docente qu’entama’l centru especializáu que s’atopa nel edificiu d’investigación del campus mierense y que dirixe Aquilina Fueyo. El rector dixo al respeutu que cada vez más los estudiantes reclamen ser protagonistes del procesu educativu, «esixen más conocencies y menos teoría», aprendizaxe que s’adquier por aciu la práctica. Presentáronse casi un centenar de nuevos proyectos educativos que fueron analizaos nel alcuentru.