Marián Osacar recibe’l premiu “Semilla de Plata”

L’Espaciu Escénicu El Güertu vieno acabante conceder el so galardón añal “Semilla de Plata”  a Marián Osacar, Xefa del Departamentu de Promoción de les Artes de la Fundación Municipal de Cultura, Educación y Universidá Popular del Conceyu de Xixón, pol so compromisu cola danza.

Los méritos de la premiada afitense na puesta en marcha y caltenimientu demientres quince años de l’Amuesa Internacional d’Artes del Movimientu “Dancia Xixón”, que dende’l so entamu xorreció en repercusión convirtiéndose n’unu de los festivales de danza de referencia nacional, collaborando a dar una mayor visibilidá a esta espresión artística na nuesa rexón.

L’actu d’entrega d’esta quinta edición va tener llugar el próximu xueves 15 d’Ochobre nes instalaciones del Espaciu Escénicu El Güertu (C/Severo Ochoa 93 de Xixón) a les 13.00 hores yva apurrir el premiu Marifé Antuña, que foi premiada con esti galardón nel pasáu añu. Tres el mesmu sirvirá un vinu español.

Los ganadores del premiu nes ediciones anteriores foron  Etelvino Vázquez (Director de escena y actor),  Kaos, Taller de Danza (Colectivo cultural) y Alejandra Tassis (Profesora y promotora de danza), amás de la periodista Marifé Antuña.