Los sindicatos ven insuficiente la convocatoria d’oposiciones

L’arranque del cursu sigue amenando crítiques ente los sindicatos y a la escasez de medios en dellos centros escolares sumase agora la falta de profesores n’otros y la murnia convocatoria de places pales oposiciones de secundaria d’esti añu.

Ello ye que pa iguar esti problema’l secretariu xeneral d’Enseñanza de CC OO d’Asturies, Enrique Fernández, reclama al Gobiernu del Principáu que convoque más de 3.000 places pal afitamientu y reposición de puestos docentes na comunidá. Según Enrique Fernández, teniendo en cuenta les previsiones de xubilaciones pa 2017, 2018 y 2019 y la necesidá de recuperar l’emplegu perdíu y l’afitamientu d’interinos, sería la cifra envalorada pa «dar estabilidá a les plantiyes». Asina lo apuntó en rueda de prensa p’analizar l’entamu del cursu y les reivindicaciones sindicales na enseñanza Pública non Universitaria, Privada y Universidá.

Igualmente, el responsable sindical encamienta a la Conseyería d’Educación a coordinase coles demás comunidaes autónomes p’apautar que la OPE de Secundaria sía pa toes en 2018 «a poder ser el mesmu día a la mesma hora», y que en 2019 afítense les de Primaria pa evitar tresllaos ente comunidaes.

Enrique Fernández cree que la precariedá y temporalidá tán faciéndose «cróniques» nel sistema educativu, proponiendo volver al númberu d’hores previu a la crisis, lo que supondría pasar de 21 a 18 hores selmanales nel casu de Secundaria. Esta midida dexaría, según CC OO, xenerar ente 800 y 1.000 places «solo amenorgando l’horariu lectivu».