Los sindicatos d’Educación alienden el regresu de les cocines a los colexos

Los sindicatos d’Educación abogen pol regresu de les cocines a los colexos, como vieno acabante de dexar afitao Gumersindo Rodríguez, presidente de l’Asociación Nacional de Profesores Estatales (ANPE) n’Asturies, que coincide cola reclamación fecha pola federación d’asociaciones de padres y madres de Xixón y Carreño. 

Anguaño, solo 81 colexos asturianos cunten coles sos propies instalaciones de cocina nes que personal de función pública ellabora la comida. «Nun sabemos esactamente a qué obedeció que l’Alministración arrenunciara de contratar esti serviciu como tola vida y decantárase por otros de tipu industrial, quiciabes fora pol costu», diz Rodríguez, «pero non puede faese programes promoviendo la salú, el deporte y l’alimentación sano que topeten frontalmente colo que s’ufierta dempués nel colexu».

Ellaborar les comíes al momentu, con productos frescos, de proximidá y bona calidá resultaría, a la llarga, «meyor y más barato», coincide Emma Rodríguez, del Sindicatu Unitariu y Autónomu de Trabayadores de la Enseñanza n’Asturies (SUATEA), pa quien estes condiciones solo puede garantizar «una cocina y cocineros propios. De lo contrario, ta xugándose cola salú de los neños», alvierte. Y anque entiende que’l cambéu hai de faese de manera progresiva, defende que «l’enclín nos nuesos colexos tien de ser esa, reconsiderar lo que teníamos antes. El Principáu tenía una serie de servicios que foi esaniciando, pero l’alimentación de los neños non puede vese solo dende una perspectiva economicista», señala.

De forma similar esprésase Borja Llorente, de CC OO. El sindicalista pide «que se contrate a cocineros qu’ellaboren la comida con criterios ensin basar na rentabilidá sinón na calidá de los alimentos». «Los comedores escolares tienen que tener xestión autonómica, pública y directa».