Los responsables de política llíngüística de tol Estáu aconceyen en Valencia

El I Seminari de Direccions Generals de Política Lingüística axuntó esta fin de selmana en Valencia a los responsables de Política Llingüística de les comunidaes autónomes con llingua propia.

Los responsables de les direiciones xenerales de política llingüística de Navarra, Aragón, Galicia, Euskadi, Valencia, Cataluña, Baleares y Asturies aconceyaron esta selmana en Valencia dientro la Fira els Idiomas que taba organizada pol gobiernu valencián y que tamién tuvo presencia institucional asturiana al traviés d’un stand qu’amosó les novedaes lliteraries del nuesu idioma.

La Conseyería d’Educación y Cultura amosaba nel so estand la producción lliteraria y musical n’asturianu, les campañes de promoción y normalización, y la situación del asturianu y el gallego-asturianu nel sistema educativu, los medios de comunicación y la sociedá.

Pela so parte, el director xeneral de Planificación Llingüística y Normalización, Fernando Padilla, asistió a diverses actividaes, ente elles, un congresu sobre multillingüismu entamáu pola Dirección Xeneral de Política Llingüística y Xestión de Multillingüismu de Valencia, y el I Seminariu de Direcciones Xenerales de Política Llingüística del Estáu.

Mientres la celebración del congresu L’apueste pol multillingüismu, 15 años de marcu européu común de referencia y el porfolio européu de les llingües, Padilla intercambió esperiencies colos profesionales que trabayen nel campu del aprendizaxe y nel de la planificación llingüística.

Amás, nel I Seminariu de Direcciones Xenerales de Política Llingüística del Estáu, los responsables de los territorios con llingua propia y competencia estatuaria en materia llingüístico aldericaron sobre’l papel que tien qu’asumir el Gobiernu central p’algamar una realidá multilingüe.