Los nacionalistes de tol Estáu reclamen respetu pa con Catalunya

Andecha Astur, Bloque Nacionalista Galego (BNG), Bloc Nacionalista Valencià (Bloc), Chunta Aragonesista ( CHA), Euskal Herria Bildu ( EH Bildu), Esquierda Castellana ( Izca), Mes per Mallorca (MES) y Puyalón de Cuchas reclamen respetu pa haza les decisiones del pueblu catalán.

Les mentaes organizaciones polítiques nacionalistes declararon esta selmana que van trabayar p’abrir “un nueu tiempu” nes rellaciones ente les naciones del Estáu. Coincidiendo cola cellebración de la Diada un total d’ocho formaciones polítiques de distintes naciones y pueblos del Estáu cellebraron, el 10 de setiembre, un alcuentru en Barcelona destináu a dar un sofitu espresu al pueblu catalán y a abrir una vía de solidaridá activa énte “les menacies y ataques”  al procesu abiertu nesti país.

Representantes de Galiza, Castiella, Mallorca, Valencia, Euskal Herria, Aragón y Asturies adoptaron una declaración na que se reclama respetu haza les decisiones qu’adopte la ciudadanía del Principat el 27 de Setiembre. Estes formaciones comprometiéronse amás a coordinar cara al futuru eventuales rempuestes énte les midíes que pueda adoptar l’Estáu escontra Catalunya, y más en  xeneral a compartir  iniciatives pa faer avanzar les reivindicaciones soberanistes nos sos respeutivos países.

L’aconceyamientu tuvo como escenariu la see de Ciemen  Centre Internacional Esquarré per a les Minories Etniques y les  Nacions ) y cuntó cola presencia, comu anfitriones y observadores del alcuentru, de representantes de CUP y ERC.

Cola vista puesta nes elleiciones del 27 de Setiembre nel Principat, formaciones de Galiza, Euskal Herria, Castiella, Asturies, Aragón y tamién de Pais Valencià y Mallorca, reconocen espresamente’l “caráter plebiscitariu y/o costituyente” d’esos comicios.

Andecha Astur, Bloque Nacionalista Galego (BNG), Bloc Nacionalista Valencià (Bloc), Chunta Aragonesista ( CHA), Euskal Herria Bildu ( EH Bildu), Esquierda Castellana ( Izca), Mes per Mallorca (MES) y Puyalón de Cuchas espresen con claridá que la situación en Catalunya, y la manera en qu’ésta s’encare pola comunidá internacional, la Xunión Europea y l’Estáu español, “va determinar en gran midía les posibilidaes de que s’afaye un marcu de respetu al drechu de les nueses naciones a adoptar llibremente les decisiones qu’afeuten al so futuru”.

De la mesma, les organizaciones impulsores del manifiestu entienden que “el respetu a la voluntá democrática y la reconocencia de los drechos de los Pueblos tienen de ser les bases d’un marcu de rellaciones más xustes y solidaries” y manifiesten la so aspiración a “costruyir una nueva Europa, en base a un modelu de xusticia social y de bon vivir, que llibre a los pueblos del chantaxe de la delda y caltenga los drechos sociales básicos y les llibertaes ciudadanes”.

Les formaciones participantes nel alcuentru de comprometieron a caltener una interlocución permanente en redol al procesu abiertu en Catalunya, másime “cuando dende l’Estáu cúrsense toa triba de menacies y apúntense yá midíes coercitives” escontra Catalunya.

Igualmente, na xunta alcordóse abrir víes de “interllocución y collaboracion” ente les formaciones firmantes del sopelexu y “otres que puedan reconocese nos términos d’esta iniciativa cara a faer avanzar l’alderique en favor d’una rutura democrática al atalantar que “el cambéu políticu xugar nes naciones y nel respetu al so drechu a decidir sobro to les custiones qu’afeuten al so futuru, o lo que ye lo mesmo nel afayamientu de procesos costituyentes non subordinaos a una eventual y, anguañu, pocu plausible reforma de la Costitución española de 1978”.