Los docentes critiquen que relaxen les midíes el próximu cursu

Los sindicatos educativos refuguen en comuña que se relaxen les midíes pal próximu cursu, que se presenta 100% presencial, tal que indiquen ministeriu y conseyería. Una les midíes, avanzada por Celaá, ye flexibilizar la distancia de seguridá y pasar de los 1,5 metros actuales a los 1,2 ente pupitres.

Los sindicatos nun consideren la propuesta razonable y pregúntense “cuálos son los criterios científicos pa xustificar esta midida” y lo mesmo cola cuestión apuntada pola conseyería de dir retomando les ratios previes a la dómina pre-covid (23-25 neños per aula n’Infantil y 25 en Primaria y Secundaria), cuando hasta agora’l númberu de neños per clase hasta segundu de la ESO ye de 20. “Caltener la distancia dexa amenorgar ratios y una medría de profesores”, sigún los sindicatos, y, magar que Barbón manifestó que nun hai recursos pa siguir coles contrataciones extra (hubo 754 docentes de refuerzu), les centrales reclamen que se caltengan y les ratios amenorgaes, tamién.