Los Centros d’estudiu d’Uviéu amplíen horarios dende’l 1 d’avientu al 31 de xineru

La conceyalía de Centros d’Estudiu, que dirixe la conceyala Cuadonga Díaz, va ampliar los horarios de los Centros d’estudiu dende’l día 1 d’avientu de 2022 hasta’l 31 de xineru de 2023, pa facilitar l’estudiu a los usuarios qu’encaren esti próximu periodu d’exames.

Dende esti serviciu realizóse un esfuerzu por que toos los centros puedan abrir, n’horariu ininterrumpíu, de llunes a domingu, de 09:00 a 00:00 hores, sacantes el centru d’estudiu de La Lila que va caltener el so horariu de 09:00 a 14:00 y de 16:00 a 21:00 hores, de llunes a vienres.

Mientres el periodu mentáu, sorrayó la conceyala Cuadonga Díaz, “estos equipamientos solo van cerrar los díes 25 d’avientu y el 1 de xineru. Les xornaes del 24 y 31 d’avientu van abrir de 09:00 a 17:00 ente que el 6 de xineru fadranlo de 17:00 a 00:00 hores”. En cuanto al de La Lila, va pesllar tamién el día 6 de xineru (los díes de Nuechebona y Nuechevieya tamién va permanecer zarráu al celebrase na fin de selmana)

“Tres dos años de pandemia , los centros d’estudios recuperen los sos horarios. Esta ampliación demuestra’l compromisu d’esti equipu de gobiernu, lideráu pol Alcalde, Alfredo Canteli, colos estudiantes”, añedió la responsable municipal de Centros d’estudiu.

Más información en https://www.oviedo.es/centrosdeestudio