Fernando Padilla sedrá’l Director de Planificación Llingüística y normalización con más funciones

El nomamientu de Fernando Padilla como nuevu Director Xeneral de Planificación Llingüística filtrose esti martes pela tarde tres del alcuerdu qu’alcanzara IX col Gobiernu pa que la Dirección Xeneral que cuente coles competencies alrodiu de la llingua asturiana dependa directamente del Conseyeru d’Educación y non del Viceconseyeru como hasta agora.

Fernando Padilla fuera hasta hai unos años asesor técnicu de la Conseyería d’Educación a lo llargo de munchos na década pasada y encargábase, ente otres llabores, d’organizar actividaes como la Sestaferia del profesoráu. Mayestru, con llarga carrera profesional en Canaries y nel país, ye tamién un fondu conocedor de la situación de la llingua asturiana nel sistema educativu asturianu lo qu’amuesa que’l Gobiernu ta escoyendo especialistes nel ámbitu educativu, que paez sedrá piedra angular de la so xera cultural nesta llexisllatura. L’anuncia oficial del nomamientu entá nun se produxera, pero depués d’espardese ayeri la noticia nun paez que puean xurdir novedades al respective.

La  nueva dirección xeneral de Planificación Llingüística y de Normalización, amás de la xubida de nivel nel organigrama de la Conseyería va cuntar con más competencies y funciones que tienen que ver, esplicó Llamazares, cola Alministración, col asturianu na educación y col asturianu nos medios de comunicación.

Pa Gaspar Llamazares, “a última hora, ye  una potenciación del asturianu y ye más importante’l conteníu de la Dirección Xeneral y de la so dependencia directa del Conseyeru que la denominación final d’esa función, que nós deseyábamos que fora una viceconseyería pero qu’a la fin l’alcuerdu ye de Dirección Xeneral de Planificación Llingüística y Normalización”. La dependencia direuta del Conseyeru, Genaro Alonso ye una bona señal, pero que tendrá d’afitase cuando se conozan les funciones de la Direición Xeneral y la persona que la ocupe.