Les fogueres enllenen el país na nueche de San Xuan

Asturies prende cada 23 de xunu pa celebrar la nueche más curtia del añu, y lo que supón, de fechu, l’entamu de les fiestes de branu en tol país. Ente les más importantes fogueres de San Xuan, tán les de Xixón, Mieres, Uviéu, Noreña, Villaviciosa, Navia, Llanera, etc. Pero’l país celebra esta enraigonada folixa en tolos requexos, con pequeñes fogueres vecinales qu’allumen la nueche en sableres, praos y places de la cuasi totalidá de los conceyos asturianos. N’Asturnews facemos repás a una parte importante de les que van celebrase.

Xixón, la gran foguera d’Asturies

Na ciudá más grande d’Asturies celébrase la foguera con más sonadía. A partir de les ocho la tarde, el grupu folclóricu “Los Xustos” actúen nel paséu de Begoña. A les nueve va facese l’enramáu de la fonte de Pelayo, al cargu d’Andecha de Cultura Tradicional na Señardá. A partir de les diez les gaites tomen les cais coles bandes “Noega” y “Villa de Xixón”, pela Plaza Mayor y la cai Corrida. La foguera celébrase na Playa Poniente a partir de les doce la nueche, con fueos artificiales, Danza Prima y conciertu d’“Asturiana Mining Company”.

Mieres, una foguera “desesperada”

Y ye que “Desesperada” sedrá unu de los temes que podrá sentise a la célebre cantante Marta Sánchez nel conciertu que va celebrar dempués de la foguera de Mieres, a la una la nueche. Sicasí, muncho enantes, a les once y media la mañana, entamen les actividaes, con xuegos predeportivos. A les siete la tarde, enramáu de les fontes del conceyu, y a les ocho, preparación de la Foguera, la conocidá como “la Cargüeñá” (Acarréu de lleña pa la foguera) Y mientres unos carreten, otros van celebrar l’arrozada. A les 23, 15 celébrase un gran espectáculu de fueos artificiales tituláu “¡Color, lluz, maxa!”, y na foguera, Danza Prima.

Noreña, foguera musical y de tradición

La foguera que se celebra en Noreña tien a la música por protagonista. A partir de les siete la tarde celébrase amás, nel Parque los Riegos, un desfile de Cabezudos acompangaos de Tambor y Gaita. A les 20:00 hores xuegos tradicionales pa neños y una amuesa de música tradicional. A les diez de la nueche va cuntase cola orquesta “LaNoche” y dempués de la foguera, que se prende a les doce, actúa’l grupu ska-reggae“La Tarrancha”.

Villaviciosa, foguera medieval

Nel Campu San Xuan d’Amandi, en Villaviciosa celébrase una fiesta de prau, a la oriella del ríu, xunto a la ponte medieval y la ermita del Santu. Un espaciu mui especial nel que pela tarde va celebrase una xira a la que da pasu una verbena. A media nueche, báillase la Danza de San Xuan d’Amandi alredor de la foguera, col sofitu, nesta ocasión del Grupu Folcklóricu “Villaviciosa”. La folixa sigue darréu hasta l’amanecer.

Doble cita con San Xuan na capital d’Asturies

N’Uviéu, celébrense dos fogueres parroquiales. La primera d’elles tien llugar en La Corredoria. El día va entamar a les 19:30 hores, con una misa polos socios de la comisión de fiestes finaos esti añu. A les 21:30 hores entama la romería y verbena amenizada poles orquestes Dominó y Tango. A les 22 hores escuéyese a la Reinina y Reina de les fiestes, y a les doce la nueche préndese la foguera.

A la mesma hora, en Santianes celébrase una foguera ente la xente del pueblu que da entamu a les fiestes del llugar, qu’entamen perdafechu esti vienres 25.

Llugo y Posada ufierten foguera en Llanera

El conceyu de Llanera cunta tamién con dos cites. En Llugo, celébrase San Xuan con parriyada y la música del grupu folklóricu Picu Santufirme. A les once préndese la foguera y báillase la Danza Prima alredor.

En Posada, repiten el plan de los sos vecinos: parriyada, anque nesti casu amenizada pol grupu folklóricu La Madreña y foguera con Danza Prima, dende les once.

Avilés treslládase a Trasona pa celebrar San Xuan

El programa de la Foguera de San Xuan d’Avilés, que tien llugar xunto al banzáu de Trasona, ye unu de los más ambiciosos. Va entamar a les diez de la nueche con un conciertu d’Spanta la Xente. A les once, celébrase una actuación del grupu de teatru pa neño “El Ñeru de los Coríos”, que muestra’l so espectáculu Los Pyroduendes II. Dempués de la foguera conciertu de la banda de gaites de Corvera, Rarefolk y a les dos de la mañana, como pieslle, Llangres.

El barriu de Llaranes tamién celebra una foguera vecinal, dempués de dellos años ensin convocala.

Navia, la gran foguera del occidente

En Navia celébrase una de les fogueres más multitudinaries del occidente. Dende les cuatro la tarde neños y adultos pinten xuntos el gran cuélebre que dempués se quema na foguera. A les seis de la tarde celébrense nel Parque Alfonso Iglesias xuegos populares y a partir de les doce la nuech, nes pistes d’El Pardo, va arder la conocida como “la Gran Fogueira d’Amancio”.

En Tinéu, la foguera celébrase nel barriu de San Xuan, onde tán de fiestes. Al otru día celebren misa solemne y procesión dende la ilesia a la fonte San Xuan, onde se celebra la foguera la nueche anterior.

En Santalla d’Ozcos, celébrase foguera popular con música, sidra y pinchu. De la mesma forma, en Cangas, a partir de la media nueche, foguera nel barriu del Corral. Soirana, Puertu Veiga, nel conceyu de Navia, tamién celebren foguera. A partir de les diez repártese sidra de baldre y toca la banda de gaites “Aires de Valdés”. Xunto a la capiella de San Xuan, a partir de les 23:30 préndese la foguera. La tercer cita nel conceyu navetu ye en Talarén, nuna foguera amenizada con música.

En Trelles Cuaña y tres la ilesia parroquial de San Xuan, va celebrase otra foguerina, a partir de la media nueche.

Otres fogueres y foguerines

Tán planificaes tamién otres pequeñes fogueres en llugares como Campu Casu, a partir de les diez de la nueche, con cena y conxuros; La Pola Llaviana, onde a partir de les doce, y cabo’l ríu Nalón, xunto a la escuela, va prendese la foguera llocal; Rusecu (Sobrescobiu), onde la enllena de les selmanes últimes marchó con parte de lo axuntao pola mocedá del pueblu pa la foguera, tamién va celebrar foguera a partir de la media nueche, sedrá na zona conocida como La Nave.

La nueche más curtia del añu va celebrase tamién en La Torre, Samartín de Grazanes, n’Onís, onde a partir de les diez y media van prender una pequeña foguera, qu’anuncien, “va poder vese dende la vega’l Güeña”.

N’El Remediu, en Nava, celébrase una foguera, xunto al Centru Social de La Pría. Y en Candás (Carreño) celébrase la foguera na playa la Pregona, con música tradicional y la Danza Prima, a partir de la media nueche.

Cabrales, el San Xuan más tardiegu

Non tolos llugares d’Asturies escueyen el 23 pa celebrar la foguera. La llocalidá cabraliega d’Arenas va celebrar la so foguera’l próximu vienres 25, a les 12 la nueche.