Les clases de la Universidá Popular d’Uviéu entamen el 8 de payares

La Universidá Popular va volver al formatu presencial el próximu 8 de payares. La conceyalía d’Educación publicó la selmana pasada la llista d’alumnos almitíos nos  distintos cursos ufiertaos pol Conceyu, por que procedan nel plazu de cuatro díes llaborables al pagu de la matrícula y asina poder afaer el Conceyu’l númberu d’inscritos coles plaza ufiertaes.

Dende la conceyalía d’Educación señalen que va haber dellos cursos nos qu’hai muncha demanda nos que se va a tratar de doblar clases p’amenorgar les llistes d’espera, anque va haber  qu’esperar a conocer el númberu real d’alumnos inscritos. Los cursos ufiertaos anguaño inclúin una temática bien diversa: dende hestoria de distintos movimientos artísticos a Ópera, fotografía y vídeu dixital, apicultura, Camín de Santiago, jazz, nutrición y ayalgues etnográfiques.

La conceyala d’Educación, Lourdes García, celebra “la vuelta a les clases presenciales nun programa formativu bien queríu polos ciudadanos que, a lo último podemos retomar en vivu. Consiguimos iguar el problema que teníamos al nun poder siguir usando l’edificiu del Pavu Real destinando dellos espacios en Centros Sociales, colos que cumplimos les esixencies de distanciamientu y ventilación que nos imponen les circunstancies actuales”, señala la conceyala d’Educación.

Dende la conceyalía recuerden qu’hai diverses bonificaciones nel pagu de la matrícula: exenciones de pagu pa los demandantes d’empléu ensin prestación, bonificación del 50% pa los alumnos con una discapacidá igual o superior al 33% y descuentos del 5% pa los titulares  de carné nuevu.