Les cenices de Bowie van ser espardíes en Bali por un ritu budista

El cantante David Bowie mandó la so fortuna, cifrada nunos 100 millones de dólares (unos 92 millones d’euros), a la so muyer, los sos fíos y dellos allegaos, y amosó el deséu de que les sos cenices sían espardíes en Bali, siguiendo los ritos budistes.

Asina lo especifica’l testamentu del músicu, fináu por causa de un cáncer el pasáu 10 de xineru, a la edá de 69 años, y que foi lleíu ayeri nuna corte de Nueva York, informen güei medios locales estadounidenses.

“Ordeno que los mios albacees faigan que los mios restos sían treslladaos a la isla de Bali (Indonesia) pa ser encenraos ellí conforme a los ritos budistes”, escribió’l cantante, que se confesara siguidor d’esta relixón, según el mediu estadounidense Page Six.

Sicasí, el rei del glam rock señala que nel casu de que “nun resulte prácticu” el treslláu de les sos cenices a Bali, puen ser espardíes en cualesquier otru sitiu, anque siguiendo los rituales budistes.

Nes sos últimes voluntaes, un documentu de 20 páxines robláu’l pasáu 25 d’agostu de 2004, Bowie decidió partir la so fortuna ente la so muyer, la modelu Imán, y sos dos fíos, Ducan Jones y Lexi Zahra Jones, un asistente personal y una exniñera. Iman va recibir aprosimao la metá de la so fortuna, amás del apartamentu que tenía la pareya en Lafayette Street, na isla neoyorquina de Manhattan.