Iniciativa pol Asturianu esixe que los cargos nuevos de RTPA apuesten pola normalización

La organización cívica recuerda que tovía falten por cubrir dellos puestos de dirección que son estratéxicos pa la sobrevivencia del idioma y darréu d’ello esixe que los cargos nuevos de RTPA apuesten pola normalización.
Iniciativa pol Asturianu considera imprescindible que les incorporaciones nueves a la dirección de la RTPA tengan un mayor compromisu cola normalización llingüística qu’el que vien demostrando l’actual director xeneral. La organización cívica recordaba esta selmana pasada qu’el papel de les direcciones de Conteníos, Informativos y Comunicación, entá ensin responsables, “resulta clave pa desenvolver midíes de normalización llingüística y por ello ye importante buscar persones con un perfil de compromisu llingüísticu y conocencia nel ámbitu de les televisiones como ferramientes de normalización d’un idioma”.

Amás, d’esta manera podría entamar a cumplise unu de los compromisos que’l Parllamentu arrancó a Javier Fernández pa facilitar la so investidura: Incrementar la presencia de la llingua asturiana nos medios de comunicación de titularidá pública. Mediu añu depués d’aquella promesa les emisiones nel idioma propiu algamen mínimos hestóricos.

Pa Iniciativa pol Asturianu ye imprescindible dar un xiru nesta situación y “caminar p’hacia una radiotelevisión pública que s’esprese n’asturianu con naturalidá y tresversalidá nos conteníos”. Pa llogralo  “esixe al Gobiernu y a los partíos de la oposición que propongan persones con estos perfiles pa completar l’equipu del director de la RTPA y buscar una nueva forma de facer les coses na nuesa radiotelevisión”.