La Xunta Pola aconceya col Direutor de Política Llingüística

Los representates de la Xunta pola Defensa de la Llingua Asturiana, Carlos Pulgar y Llucía Menéndez, aconceyaron esti miércoles 14 de setiembre col nuevu director xeneral de Política Llingüística, Alfredo Álvarez Menéndez. Esti alcuentru forma parte de la ronda de contactos que la organización ta teniendo pa conocer les llinies de trabayu del Gobiernu nuevu y pa esponer les sos propuestes en cuantes a la llingua asturiana.

La organización de defensa del idioma asturianu treslladó-y al Director Xeneral delles reivindicadiones y tratáronse cuestiones sobre l’usu del asturianu poles Alministraciones públiques, la situación de los servicios de normalización llingüística nos conceyos, la educación, los medios de comunicación y la toponimia.

La Xunta pola Defensa de la Llingua Asturiana quixo sorrayar asuntos como la tresversalidá del usu del asturianu nel llabor cotidianu de los departamentos de l’Alministración pública, o la estabilidá y puesta en marcha efectiva de la rede de normalización llingüística de los conceyos, afitando y optimizando llabores y recursos, amás d’abrir, consolidar y ampliar los servicios, y facer siguimientu continuu y solucionar los problemes de los servicios qu’anguaño tán pesllaos por delles razones nos conceyos de Mieres, Corvera, Siero y Piloña.

Asina mesmo, la organización treslladó a Alfredo Álvarez Menéndez el so esmolecimientu pola falta d’aplicación efectiva de los topóminos que yá son oficiales por decretu nes Alministraciones tanto autonómica como estatal y nel Ente Públicu de Radiotelevisión, pal que tamién se reivindicó l’usu vehicular del asturianu nesta plataforma normalizadora fundamental pal futuru del idioma. Al respective de la enseñanza, asuntu yá tratáu más fondamente nel conceyu cola Conseyera d’Educación y Universidaes, amosóse la preocupación fonda de la organización pola situación tristemente repetida tolos empiezos de cursu na que la falta de dilixencia na axudicación y cobertura de places afecta gravemente al alumnáu, torgándo-y el so derechu básicu al estudiu.

Esta cabera cuestión dexa a les clares tanto la necesidá de regularizar y normalizar les condiciones del profesoráu como d’afitar la presencia efectiva del idioma en tolos niveles del sistema educativu.

Alfredo Álvarez Menéndez amosó una actitú reflexiva y positiva al respective de les midíes necesaries pa la normalización y comprometióse al «desarrollu positivu y non restrictivu de la Llei d’Usu y Promoción de la llingua asturiana».

La Xunta pola Defensa de la Llingua Asturiana va tar sollerte a la definición y cumplimientu del plan de trabayu del Gobiernu asturianu en materia llingüística. Sicasí, la organización de defensa de los derechos de los asturiano-falantes considera’l desenvolvimientu de les midíes anunciaes dientro del marcu actual como un reblagu previu a la tutela efectiva de los derechos llingüísticos de la ciudadanía que namás va poder garantizase cola oficialidá de la llingua asturiana.