La Xunta electoral decide sobro les elecciones al Rectoráu esta selmana

Les elecciones al Rectoráu de la Universidá d’Uviéu siguen marcaes pola pandemia y amás de ser suspendíes nuna ocasión y  retrasales siquier una selmana más,  na mente de toos sigue la posibilidá de que tampoco esta vegada sía posible llevales a cabu, por cuenta de la situación actual, cosa que tien de decidir esta selmana la Xunta Electoral.

La selmana pasada decidióse siguir alantre colos procedimientos que nun impliquen movilidá y tres la presentación de les candidatures d’Ignacio Villaverde y Santiago García Granda, del 6 al 9 de payares taba abiertu’l periodu de presentación de reclamaciones a diches candidatures, que tendríen de ser arreglaes ente’l 10 y el 11. Esti 12 de payares tendría de empezar la campaña pero nla Xunta decidió que va desenvolvese’l 19 de payares y va desenvolvese hasta’l día 3 d’avientu. La xornada de reflexón sería’l 4 y les votaciones, que taben previstes pal 1 d’avientu, seríen el día 9, una selmana dempués. Tres la proclamación provisional, plazu de presentación de reclamaciones y respuestes, la proclamación definitiva del rector sería’l 15 d’avientu.

Esos son los planes a día de güei, cola intención clara de «escosar toles posibilidaes» antes de tener que dir a una nueva suspensión, yá que se trata d’un procedimientu importante pa la Universidá d’Uviéu, que yá llega con retrasu, pero esta selmana tendríen de confirmase les candidatures y ye probable que vuelva falase na Xunta Electoral de la posibilidá de postergar otra vuelta les elecciones, lo que les llevaría al mes de Febreru, tres dela suspensión del períodu lectivu poles navidaes. La Xunta Electoral quier escosar toles opciones antes de tener que volver suspender la elección del nuevu rector.

Si llegáu’l día 18 de payares les restricciones nun sumieron o inclusive s’endurecieron, la Xunta Electoral tendría de buscar nueves alternatives. Ta claro que nun ye’l momentu de movilizar un censu qu’arrexunta a 23.000 persones, de les que 6.000 votaron nel últimu procesu electoral, celebráu nel añu 2016, nun momentu nel que les autoridaes piden acutar al máximu la movilidá y los contactos. Pero tamién tien claro la Xunta qu’hai qu’escosar los plazos y les posibilidaes y que se non puede aplazase ensin más el procesu. Si les restricciones prosiguen tamién quedaría la opción del votu telemáticu, una posibilidá que ta sobre la mesa.