Portada Política La Xunta califica como “decepcionante” el pautu IX-FSA y de “nefasta” la política llingüística actual

La Xunta califica como “decepcionante” el pautu IX-FSA y de “nefasta” la política llingüística actual

by asturnet

La Xunta pola Defensa de la Llingua Asturiana calificaba esti vienres l’alcuerdu de gobiernu ente PSOE ya IX-Bloque por Asturies-Los Verdes como “decepcionante y continuador de la política de marxinación llingüística llevada alantre hasta’l momentu pol gobiernu del PSOE, política que vien siendo criticada sistematicamente pola Xunta como un plan pa esterminar l’asturianu a mediu plazu”. Amás d’eso, la Xunta dicía nun comunicáu fechu públicu pela mañana que nun se pue escaecer “que la FSA ta acabante de proponer una redacción entá más restrictiva d’artículu 4u del Estatutu d’Autonomía nel que la llingua asturiana desapaez como tal pa convertise nun «patrimoniu». Nesti contestu danse les negociaciones qu’orixinen el presente alcuerdu de gobiernu”.

El comunicáu afonda nel fechu de que “nel testu del alcuerdu abonden les declaraciones d’intenciones xenerales y escasien o nun esisten les concreciones sobre les midíes, actuaciones, aplicaciones y plazos que tendríen que guiar la política llingüística del nuevu gobiernu”. La Xunta atalanta que se tien qu’entender que “la non esplicitación de midíes concretes implica la non esistencia d’eses midíes nel pautu de gobiernu”.

El comunicáu de la Xunta pola Defensa de la Llingua sigue diciendo que “si énte l’alcuerdu ente estes mesmes fuercies polítiques en 2003 la Xunta amosó una postura enforma crítica, esti nuevu pautu confirma les impresiones que tuviéramos daquella: ye imposible afitar un procesu de normalización ensin una voluntá y compromisos concretos, que nun existen tampoco anguaño”.

Por tolo mentao, l’asociación cívica de defensa de los asturianofalantes valora “de forma especialmente negativa la falta de referencies a la necesidá de normalización de la llingua, un términu omnipresente nel pautu de 2003”. Igualmente “desapaecen les referencies al desarrollu de la Llei d’Usu” y, nesi sen, “el testu del alcuerdu ye en tou casu una llectura parcial y restrictiva de lo contenío na Llei d’Usu y Promoción del Asturianu vixente dende l’añu 1998 y polo tanto d’obligáu cumplimientu”.

Pala Xunta, “l’asturianu ye la única llingua del Estáu español que nun ye oficial, lo que ye causa fundamental de la situación actual de grave retrocesu, de perda de falantes y ámbitos d’usu. La falta d’un marcu llegal que garantice los derechos llingüísticos básicos y una presencia digna nel sistema educativu, nes alministraciones y medios de comunicación públicos, toponimia, etc., lleva irremediablemente a la desapaición del idioma a curtiu o mediu plazu”.

Esti procesu “nun pue tornase con polítiques cosmétiques, sinón con aquelles qu’avancen hacia la dignificación de la llingua y la so equiparación llegal col restu de llingües del Estáu. Si la intención del nuevu gobiernu fuera la d’afitar el futuru del idioma tendría qu’esplicitase la voluntá de construir consensos pa la inclusión de la oficialidá na prósima reforma del Estatutu d’Autonomía. Obviar el problema de la non oficialidá, dicir qu’agora nun toca pa llegar a alcuerdos de gobiernu, non solo nun val de solución sinon que val pa consolidar más tovía l’escenariu actual de marxinación y falta de derechos”.

Dende la Xunta pola Defensa de la Llingua Asturiana va siguise “trabayando pa sumar a tolos axentes políticos y sociales d’Asturies na defensa d’un patrimoniu común que pertenez a tolos asturianos y asturianes”. Pero tamién se va siguir denunciando, “cola mesma claridá qu’hasta agora, les práctiques polítiques que xeneren prohibiciones, coacciones y ataques contra l’usu de la llingua asturiana, como les qu’anuncia con esti alcuerdu esti gobiernu que ye nuevu nos sos componentes pero que nun apurre nenguna novedá na nefasta política llingüística actual”.

Tamién te podria gustar