La XDLA denuncia l’actitú asturfóbica de Maurio Bogomak, conceyal de Deportes de Siero

La XDLA denuncia l’actitú asturfóbica de Maurio Bogomak, conceyal de Deportes de Siero, por prohibir l’usu del nuestru idioma na camiseta oficial de la XXV Media Maratón, faciéndonos retroceder a situaciones de marxinación que nun se recordaben dende la década de los 80 y qu’entamen a tornar otra vuelta nos caberos años tanto nos conceyos como na Universidá y otres fasteres institucionales. El problema de la camiseta ye, como se pue ver na semeya, tres lletres que diferencien l’asturianu del castellanu de Campeonatu d’Asturies.

La Xunta pola Defensa de la Llingua Asturiana (XDLA) quier denunciar l’actitú asturfóbica de Maurio Mauricio Bogomak Medeiro, conceyal de Deportes, Seguridá Ciudadana y Rellaciones Institucionales del Conceyu de Siero, qu’acaba de prohibir l’usu del asturianu na camiseta oficial de la XXV Media Maratón de Siero, prueba qu’entra dientro del Campeonatu d’Asturies.

Precisamente, son namái tres lletres que diferencien l’asturianu del castellanu de Campeonatu d’Asturies les que tanto cafíen al conceyal y que valieron pa qu’echara’l diseñu de la camiseta p’atrás. La situación ye tovía más grave cuando d’esta persona y de la so Conceyalía depende la Política Llingüística d’esti Conceyu. La XDLA entiende que ye bien difícil que se produza dalgún avance nesi sentíu si la persona que tien les competencies pa visibilizar el nuestru idioma tien tantos prexuicios hacia l’usu del asturianu. Ye de reseñar que nel campu de los deportes, el Conceyu de Siero vien faciendo, al traviés del Patronatu de Deportes, un usu normal de la llingua al traviés de la rotulación billingüe de los equipamientos deportivos, midíes que tuvieren l’aceptación pola xente de Siero. Por too ello, la XDLA esixe una rectificación de Maurio Bogomak énte esta discriminación grave hacia los falantes d’asturianu y esti ataque al patrimoniu llingüísticu del país. Nun pue ser que los sos prexuicios personales supongan un pasu atrás en dalgo que la ciudadanía de Siero yá acepta como dalgo normal.