La sociedá civil pola oficialidá. El CAO convoca a la ciudadanía a participar na Manifestación del 18 de payares

El Conceyu Abiertu pola Oficialidá convocó ayer a la ciudadanía asturiana a participar na manifestación del 18 de payares. La manifestación entamará a les 18 hores na estación del Norte d’Uviéu, Renfe, baxo’l lema “Na reforma del estatutu l’asturianu llingua oficial”. Fernando Ornosa, portavoz del Conceyu Abiertu pola Oficialidá, acompañáu por Luís Arias Argüelles Meres y Francisco Javier Fernández Conde anunciaron la convocatoria de la manifestación. Les empreses que s’anunciaron nel portfoliu del Conceyu Abiertu collaboren económicamente colos gastos de la convocatoria.

La primbera pancarta de la manifestación llevaránla representantes de la sociedá civil asturiana na que van tar ente otres persones: Amelia Valcárcel Bernaldo de Quirós, miembra del Conseyu d’Estáu; José Ramón Sariego, de l’Asociación de vecinos de Pumarín, Uviéu; Toño Velázquez, entrenador del Real Uviéu; Santi Caleya, músicu; Ana Maria Cano, Decana de la Faculta de Filoloxía y Presidenta de l’Academia de la Llingua; Xosé Nel Riesgo, xeógrafu y miembru de la Fundación Belenos; Celia González, del Coleutivu Muyeres; Fructuoso Pontigo Concha, Coordinadora Ecoloxísta; Maria Jesús Rodríguez, escultora.
La segunda pancarta del cortexu llevaránla representantes de los diferentes partíos, sindicales y organizaciones que componen el Conceyu Abiertu pola Oficialidá.
Darréu les pancartes del Conceyu Abiertu pola Oficialidá más de venti bandes de gaites y 200 gaiteros darán pasu al restu del cortexu cívicu que recorrerá les cais de la capital del país esixendo los sos derechos llingüísticos. La manifestación concluirá na plaza de la Catedral cola intervención, en nome de les 170 organizaciones que componen el CAO, d’Ana Vanessa Gutiérrez que lleerá’l manifiestu del CAO pa dar pasu a un conciertu final nel que tocarán Santi Caleya, Carlos Rubiera y Los Gatos del Fornu.

El portavoz del Conceyu Abiertu pola Oficialidá, Fernando Ornosa, fizo un llamáu d’atención a los partíos políticos mayoritarios, PSOE-FSA y PP, pa que nos sos programes electorales afiten un marcu llegal pal asturianu, y pal gallego-asturianu, de mou que s’abran les puertes a la oficialidá na próxima reforma del Estatutu. Fernando Ornosa volvió ufrir la oferta de diálogu del Conceyu Abiertu pola Oficialidá a los llíderes de los partíos políticos con representación parlamentaria pa “iguar la llaceriosa situación de los derechos llingüísticos de los y les asturianes”.
L’escritor, profesor y articulista Luis Arias Argüelles-Meres presentóse como un ciudadanu ensin vinculación con nenguna plataforma política, sindical o de cualesquier otra triba que nagua pola reconocencia de los derechos llingüísticos de la población asturiana. P’Argüelles Meres el derechu a emplegar l’asturianu ha ser reconocíu como un derechu cívicu. Luis Arias Argüelles-Meres fizo un llamáu a emplegar les diferentes canales d’información como elementos normalizadores del usu de la llingua. P’Argüelles-Meres el problema llingüísticu ye un bon exemplu de la “incapacidá d’esta tierra pa resolver los sos problemes”.
Francisco Javier Fernández Conde, catedráticu d’Historia Medieval y Académicu de la Llingua Asturiana dixo sintir “pena ente la terquedá de la clas política asturiana” que viendo morrer a la llingua asturiana negábase a atender les demandes ciudadanes pa la so salvación. El Catedráticu afirmó que los intentos de diálogu colos políticos asturianos, sobre la cuestión llingüística, yeren similares a tar “falando con una paré”. Pa Fernández Conde la cuestión llingüística ye un compromisu cola tierra, dalgo intimamente xuníu al futuru de la esistencia d’Asturies nel mundu de la globalización. El catedráticu realizó paralelismos ente les diferentes llingües mayes, y los pueblos, d’América llatina y la situación llegal del asturianu, mientres que les llingües mayes son consideraes oficiales n’Asturies l’asturianu nun tien esa consideración. Pa finar dixo que “ensin oficialida, la llingua asturiana ta condenada a morrer”.