“La Puta Namorada” trai al Niemeyer el Sieglu d’Oru

L’Auditoriu del Centru Niemeyer acueye esti vienres la representación teatral de la veterana traxicomedia de Jesús Castejón, que recibió’l Premiu Max Aub al Meyor testu en 1999.

L’Auditoriu del Centru Niemeyer acueye esti vienres 16 d’ochobre, a les 20:30 hores, la representación teatral “La puta namorada”, dientro del ciclu “Teatru 2015” de la temporada ochobre-avientu’15 de escenAvilés. Tratase d’una traxicomedia de Jesús Castejón que fai un percorríu históricu pol reináu de Felipe IV, con Velázquez como personaxe principal. Un homenaxe al Sieglu d’Oru con un testu senciellu y en clave d’humor. La obra recibió’l Premiu Max Aub, al Meyor testu, nos Premios de les Artes Escéniques de la Generalitat Valenciana en 1999.

Los personaxes de Velázquez (Federico Aguáu), La Calderona (Eva Marciel) y Lucio (Javier Collada), xueguen los mesmos papeles que mientres sieglos desenvolvieron otros autores. Sicasí, nesta obra faise un percorríu pela dómina histórica que se representa: el reináu de Felipe IV. Tamién se repasen tolos aspeutos de la vida social y cultural de la España del Sieglu XVII.