La obra d’Alberto San Juan cuelga’l cartelu de ‘nun hai entraes’ tres el discutiniu col PP

La obra d’Alberto San Juan ‘Autorretratu d’un mozu capitalista’, que se va representar el 20 d’abril nel Teatru Martín Recuerda de Pino Puente (Granada), colgó’l cartelu de ‘nun hai entraes’.

L’ésitu de la ufierta teatral de San Juan vieno tres el discutiniu amenáu arriendes de que’l PP pidiera la so suspensión alegando qu’esti actor “ofendió de manera bien grave a víctimes del terrorismu, a la Ilesia, al estamentu xudicial o a la policía”.

Tres la repercusión que tuvo l’asuntu tantu nos medios de comunicación como nes redes sociales, la vienta d’entraes disparóse escosándose en cuestión d’hores, según informó’l Conceyu de Pino Puente. El conceyal de Cultura, Alberto Rodríguez, garantizó nuna nota que “dende un primer momentu” teníen claro que la obra “nun se diba suspender” y cunta que el PP tien “coses más importantes de les qu’esmolecese” que “en pone-y zancadielles a la cultura”.

Tantu’l gobiernu de la Diputación de Granada como la Xunta d’Andalucía amosaron el so respaldu a la representación d’esta obra, tachando de “llamentable y reaccionariu” que’l PP “pretenda llindar la llibertá d’espresión y creación” coles sos crítiques para “censurala”.

La Unión d’Actores y Actrices tamién treslladó estos díes el so sofitu al actor, alvirtiendo de que “non casa nada bien cola democracia l’intentu de censura y persecución” de quien, como él, son creadores artísticos y asitiándose “totalmente en contra de les persecuciones basaes na opinión del ceador o nel conteníu de la so obra”.