La ‘nueva normalidá’ educativa sigue ensin conocese n’Asturies

Güei entama la fase 2 de la desescalada y eso dexa, según el Gobiernu central, volver a entamar les clases presenciales pa determinaos grupos, dexando la última decisión a les comunidaes, polo que n’Asturies entá nun s’entama pa con ello.

El pasu de fase llegó la fin de selmana y la orde ministerial tamién y Asturies prefirió dase unos díes más de marxe p’afaer esa orde y por que los alumnos de segundu de Bachilleratu rematen la so evaluación. Nos próximos díes, la conseyería tien de comunicar la fecha concreta pa volver y dará a conocer como se desenvuelve’l calendariu que remane Educación pa la repasada de la EBAU ye del 4 al 23 de xunu.

A les aules calcúlase que van volver los estudiantes de segundu de Bachilleratu, pa preparar la EBAU. Tamién los de cuartu d’ESO, si tutores y families consideren que precisen refuerzu. Y los d’últimu cursu de Formación Profesional, pa peracabar los proyectos de fin d’estudios. Sía que non trátase d’una vuelta voluntaria y nun van tornar finalmente los alumnos de 0 a 6 años, sacantes los menores de trés nes guarderíes privaes que decidan reabrir.

Equipos directivos y personal d’alministración y servicios, tan trabayando yá nos centros y cuando los estudiantes tornen, va establecese qué docentes tienen de volver tamién al trabayu presencial. Los equipos directivos yá tán trabayando estos díes coles midíes de protección necesaries: mázcaros en casu de nun poder garantizar los dos metros de distancia, pantalles faciales en dellos casos ya hixene de manos. Colos alumnos va pasar lo mesmo. Pero nel so casu añedense dos cuestiones importantes: que los padres van ser los responsables de tomar la temperatura antes de salir de casa y vque an roblar una declaración responsable na que se faen cargu de la vuelta a les aules y dan fe de la salú de los sos fíos. Dellos centros van tomar la temperatura na entrada.

Pol momentu. caltiense’l calendariu escolar y les clases rematen el 18 de xunu pa Infantil y Primaria y el 23 pa ESO, Bachilleratu y FP. Les xeres realizaes en casa van sirvir solo pa xubir la nota. La calificación final nunca puede ser inferior a la llograda pol alumnu nel primeru y el segundu trimestre. Solo autorizóse a adelantrar materia nel casu de segundu de Bachilleratu. El restu tenía de llindase a afitar les enseñances aprendíes mientres el cursu presencial.