La Medina Azahara de Córdoba foi declarada patrimoniu mundial pola Unesco

El Comité de Patrimoniu Mundial de la Unesco resolvió esti domingu, nel marcu de so 42ª cume, que se celebra hasta’l 4 de xunetu en Manama (Baréin), inscribir al Conxuntu Arqueolóxicu de Medina Azahara (Córdoba) na Llista del Patrimoniu Mundial.

Tres esta reconocencia, Córdoba conviértese na única ciudá nel mundu con cuatro declaraciones de patrimoniu y España consolídase como tercer país del mundu y segundu d’Europa con más llugares inscritos, solo por detrás de China ya Italia.

La ciudá califal cordobesa foi construyida a mediaos del sieglu X por una dinastía occidental omeya para ser la see del califato de Abd al-Rahmán III y la so residencia privada. La ciudá creció en pocu tiempu, pero dempués foi destruyida y los restos arqueolóxicos permanecieron ocultos mientres casi 1.000 años, hasta que fueron redescubiertos a principios del sieglu XX.

Dende un puntu de vista artísticu, tratase d’unu de los complexos monumentales más orixinales dientro de l’arquitectura hispanomusulmana, por cuenta de que nin la so estructura nin ornamentación fueron alteriaos. La Ciudá Brillosa palos musulmanes componse de trés terraces arrodiaes por una muralla y trabayaríen nella unes diez mil persones. Un mileniu más tarde sigue arrodiada de lleendes y hestories, la más conocida de les cuales ye que foi construyida por amor a una muyer, que se llamaría “Azahara”.

Un espertu de la Unesco realizó la presentación, que cuntaba col decisivu aval del Conseyu Internacional de Monumentos y Sitios (ICOMOS, poles sos sigles n’inglés). L’organismu aconseyó l’aprobación de la Ciudá Califal por dos criterios: ser un únicu o escepcional testimoniu d’una tradición cultural o d’una civilización y ser un exemplu sobresaliente d’un tipu d’edificiu, conxuntu arquitectónicu o paisaxe qu’ilustra dalguna etapa destacada na hestoria humana.

Tres la presentación inicial diose pasu al preceptivu alderique, nel que puede participar cualquier Estáu representáu na Comisión –con 21 integrantes de los 193 estaos firmantes– menos España por ser parte implicada. Nengún de los países punxo oxeciones a la designación y dellos –como Noruega, Brasil y Francia– felicitaron a España pol espediente presentáu. Eso sí, al entamu de la presentación, ICOMOS encamentó que’l nome del llugar sía modificáu y pase a llamase “ciudá califal de Madinat al Zahara” por fidelidá al nome históricu.

El camín de la candidatura empezó va dos décades cuando foi inscrita nel llistáu de los bienes aspirantes, nel que se caltuvo nel añu 2000, pero refugóse, y per parte de la Xunta d’Andalucía Cultura impulsó otros bienes patrimoniales de la rexón.